Cyhoeddi rhestr fer Cân i Gymru 2025

Trystan Ellis-Morris ac Elin Fflur fydd yn cyflwyno'r noson ym Mhen-y-bont ar Ogwr

Mae'r wyth cân sydd wedi cyrraedd rhestr fer cystadleuaeth Cân i Gymru 2025 wedi cael eu cyhoeddi.

Bydd Elin Fflur a Trystan Ellis-Morris yn ôl i gyflwyno'r gystadleuaeth fydd yn cael ei chynnal yn Dragon Studios, Pen-y-bont ar Ogwr ar nos Wener 28 Chwefror.

Y cerddor Osian Huw Williams, prif leisydd y band Candelas a chyn gyd-enillydd y wobr, yw cadeirydd panel y beirniaid a fydd yn mentora'r cystadleuwyr ac yn cyflwyno tlws Cân i Gymru i'r cyfansoddwr buddugol.

Y beirniaid eraill yw'r cerddor Peredur ap Gwynedd; y gantores, actores a chyflwynydd Caryl Parry Jones, y rapiwr a chyfansoddwr Sage Todz a'r gantores a'r gyfansoddwraig Catty.

Y gwylwyr sy'n gyfrifol am ddewis cân fuddugol cystadleuaeth Cân i Gymru drwy bleidleisio am eu hoff gân.

Bydd proses bleidleisio newydd eleni a bydd y manylion yn cael eu rhannu yn ystod yr wythnos cyn y gystadleuaeth.

Fe fydd cyfansoddwr y gân fuddugol hefyd yn derbyn £5,000 a chytundeb perfformio, gydag ail wobr o £3,000 a thrydedd gwobr o £2,000.

Bydd yr holl ganeuon yn cael eu chwarae ar Radio Cymru o 18 Chwefror.

Rhestr Fer Cân i Gymru 2025

1. Troseddwr yr Awr

Cyfansoddi a pherfformio: Dros Dro

Y band Dros Dro sydd wedi cyfansoddi Troseddwr yr Awr a nhw hefyd fydd yn perfformio'r gân

2. Am Byth

Cyfansoddi: Geth Vaughan

Perfformio: Lewys Meredydd

Geth Vaughan ydy cyfansoddwr Am Byth

3. Torra Dy Gwys

Cyfansoddi: Elfed Morgan Morris, Carys Owen, Emlyn Gomer Roberts

Perfformio: Catrin Angharad Jones

Cyfansoddwyr Torra Dy Gwys ydi Elfed Morgan Morris, Carys Owen ac Emlyn Gomer Roberts

4. Gwydr Hanner Llawn

Cyfansoddi a pherfformio: Garry Owen Hughes

Garry Owen Hughes sydd wedi cyfansoddi Gwydr Hanner Llawn a fo hefyd fydd yn perfformio'r gân

5. Mae'r Amser Wedi Dod

Cyfansoddi a pherfformio: Heledd a Mared Griffiths

Heledd a Mared Griffiths ydi cyfansoddwyr Mae'r Amser Wedi Dod a nhw hefyd fydd yn perfformio'r gân ar y noson

6. Lluniau Ar Fy Stryd

Cyfansoddi: Meilyr Wyn

Perfformio: Gwen Edwards

Cyfansoddwr Lluniau Ar Fy Stryd ydi Meilyr Wyn

7. Hapus

Cyfansoddi a pherfformio: Geth Vaughan

Mae Geth Vaughan wedi cyfansoddi dwy gân yn y gystadleuaeth eleni

8. Diwedd y Byd

Cyfansoddi a pherfformio: Marc Skone

Marc Skone sydd wedi cyfansoddi ac a fydd yn perfformio Diwedd y Byd