Oes digon o ferched yn mentro i faes gwyddoniaeth a pheirianneg?

Enillodd criw o ferched o chweched dosbarth Ysgol Bro Edern wobr am eu gwaith mewn cystadleuaeth

Oes yna ddigon o ferched yn mentro i faes gwyddoniaeth a pheirianneg?

Mae'n ymddangos bod y meysydd hynny, ar y cyfan, yn denu mwy o ddynion o hyd.

Er bod ymdrechion i newid hynny, mae ffigyrau yn dangos mai ychydig iawn o gynnydd fu yn y blynyddoedd diwethaf yn y nifer sy'n astudio rhai o'r pynciau sy'n cael eu galw yn STEM ar gyfer Safon Uwch.

Mae'r pynciau hynny'n cyfeirio at wyddoniaeth, technoleg, peirianneg a mathemateg.

Mae'n bosib bod hen stereoteipiau yn dal i gael effaith, meddai'r Athro Arwyn Tomos Jones

Mae Llywodraeth Cymru dros y blynyddoedd diwethaf wedi ceisio cynyddu'r nifer o ferched sy'n dilyn gyrfaoedd yn y meysydd yma.

Ond yn ôl ffigyrau gan y Cydgyngor Cymwysterau, mae nifer y merched sy'n astudio Safon Uwch bioleg, cemeg, mathemateg a ffiseg yn y chwe blynedd diwethaf wedi aros yn eithaf cyson.

Yn 2018/19 roedd y ffigwr yn 4,720, a 4,767 oedd y nifer yn 2024/25 - er ei fod wedi codi yn rhai o'r blynyddoedd yn y canol.

Mae 'na hefyd fwy o fechgyn yn parhau i astudio'r pynciau yma - 6,015 oedd y ffigwr y llynedd.

'Efallai bod y stigma yna o hyd'

Dywedodd yr Athro Arwyn Tomos Jones o Ysgol Fferylliaeth Prifysgol Caerdydd fod mwy o ferched, yn gyffredinol, yn astudio yno na bechgyn.

Ond, beth felly ydy'r rhesymau dros brinder merched yn y meysydd eraill?

"Mae'n bosib nad ydy'r hen stereoteip wedi diflannu, nac yn wannach chwaith," meddai'r Athro Arwyn Tomos Jones.

"Efallai bod y stigma yna o hyd - nad ydy merched efallai yn meddwl mai peirianneg neu ffiseg ydy eu lle nhw."

Dywedodd Carys o Ysgol Bro Edern ei bod yn ymddiddori mwy mewn pynciau STEM ers cael cymryd rhan mewn cystadleuaeth gyda'r ysgol

Yn ddiweddar mae criw o ferched 16 oed o chweched dosbarth Ysgol Bro Edern yng Nghaerdydd wedi cymryd rhan yng nghystadleuaeth ysgolion Fformiwla 1 y byd yn Singapore.

Fe enillon nhw wobr merched mewn chwaraeon.

Dywedodd Carys, un o'r cystadleuwyr, fod y gystadleuaeth wedi gwneud iddi gymryd mwy o ddiddordeb mewn pynciau STEM.

"Nawr fi'n gwneud pedwar ohonyn nhw yn Lefel A," meddai.

Dywedodd Dewi Thomas, sy'n dysgu gwyddoniaeth a thechnoleg, fod yr ysgol wedi newid cyfnod allweddol tri i ddenu mwy o blant a merched i astudio'r pynciau STEM.

"Unwaith mae un neu ddwy yn dewis y pwnc maent yn dilyn ac yn gweld llwyddiant.

"Maen nhw'n deall bod e ddim just i fechgyn."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.