Bachgen 8 oed yn rhedeg 26 milltir er mwyn cefnogi'r digartref

Mae Lewys eisoes wedi llwyddo i godi dros £2,000 i gefnogi elusennau digartrefedd

Nid pob plentyn yng Nghymru fu’n treulio hanner tymor yn rhedeg bob diwrnod er mwyn codi arian ar gyfer y digartref.

Fe gafodd Lewys, wyth oed o dref Glyn-nedd, ei dristáu cymaint o weld dyn digartref yn Abertawe nes iddo deithio siwrne o hanner awr yn ôl adref yn ei ddagrau.

Gyda chefnogaeth ei deulu, aeth ati i drefnu her o redeg milltir bob dydd, am 26 diwrnod, gan ddod â chymuned Cwm Nedd at ei gilydd i’w gefnogi ar y ffordd.

“O’n i wedi mynd i Abertawe i siopa' a nes i weld homeless guy, o’n i wedi rhoi meal deal iddo fe,” meddai Lewys.

“O’n i’n drist, ac wedi teimlo fel o’dd e’n invisible.”

Mae Max Boyce ymhlith y rhai sydd wedi dod i gefnogi Lewys a'i ffrindiau

Ers dechrau ar 21 Hydref, mae plant yr ardal, ynghyd â chwaraewyr timau chwaraeon lleol, wedi ymuno yn yr her o gwmpas strydoedd y dref.

Doedd brawd Lewys, Gethin, sy’n 12 oed, methu credu’r gefnogaeth.

“Y timau rygbi, y timau pêl-droed, ma' nhw 'di bod yn dod hefyd,” eglurodd.

“O’n i’n meddwl bod e’n crazy a bydde’ fe ddim yn 'neud lot o arian, ond ma’ fe 'di ‘neud loads a bod yn deg.”

Cefnogaeth yn ystod y gaeaf yn 'allweddol'

Bydd dwy elusen leol sy’n helpu’r digartref – un yn Abertawe a’r llall ym Merthyr Tudful – yn elwa.

Dywedodd Thom Lynch o elusen Matthew’s House yn Abertawe y bydd y cyfraniad yn amhrisiadwy yn ystod misoedd y gaeaf.

“Ar gyfartaledd, ry’n ni’n gweld 129 o bobl bob dydd,” meddai.

“Ry’n ni’n gallu gwneud gwahaniaeth. Mae’n allweddol i ni, popeth ry’n ni’n gwneud, mae’r diolch i bobl sy’n cyfrannu i ni, sy’n codi arian i ni - pobl fel Lewys.”

Dywedodd Rhian, mam Lewys, ei bod yn derbyn negeseuon dyddiol gan bobl sydd am gefnogi Lewys gyda'r her

Gyda mwy na £2,000 eisoes yn y pot, mae mam Lewys, Rhian, yn falch iawn.

“Ni mor browd ohono fe a beth ma' fe'n neud,” dywedodd.

“Ma' fe’n anodd i fynd mas bob dydd i redeg milltir, yn enwedig pan ti’n wyth oed a ma' coesau bach gyda ti!

“Ni mor browd, a mor browd o bawb sy’n dod - cymuned Glyn-nedd.”