Wimbledon: Mimi Xu yn colli yn erbyn Emma Raducanu

Dyma oedd ymddangosiad cyntaf Mimi Xu yng nghystadleuaeth senglau'r menywod yn Wimbledon

Mae'r Gymraes ifanc Mimi Xu wedi colli yn erbyn Emma Raducanu o Loegr yn rownd gyntaf pencampwriaeth Wimbledon.

Fe enillodd Raducanu, 22, mewn dwy set, 6-3 6-3.

Xu, 17, yw'r chwaraewr cyntaf o Gymru i chwarae yng nghystadleuaeth y senglau yn Wimbledon mewn 20 mlynedd - Rebecca Llewellyn oedd y diwethaf.

Mae Xu yn rhif 302 ar restr detholion y byd, tra bod Raducanu - enillydd Pencampwriaeth Agored yr Unol Daleithiau yn 2021 - yn rhif 38.

Dyma oedd ymddangosiad cyntaf Xu yng nghystadleuaeth senglau'r menywod, wedi iddi serennu yn yr adrannau iau yn y gorffennol.

Mae Xu, o Abertawe, eisoes wedi ennill dwy gêm yn erbyn chwaraewyr ymhlith y 100 uchaf - gan gynnwys yn erbyn Alycia Parks yn rownd wyth olaf Pencampwriaeth Agored Birmingham yn gynharach yn y mis.