Y Cymry sy'n dal yn mynd i Euro 2024

Yn barod i ddal yr awyren: Bethan Richardson, Kevin Williams, Jonathan Richardson, Lynwen Williams ac Esyllt Llwyd

Wrth i bencampwriaeth Euro 2024 ddechrau mae rhai Cymry wedi parhau â’u cynlluniau i fynd i’r Almaen er bod eu tîm yn aros gartref.

Petai tîm Rob Page wedi llwyddo gyda’u ciciau o’r smotyn yn erbyn Gwlad Pwyl yn rownd derfynol y gemau ail-gyfle, byddai degau o filoedd o’r Wal Goch yn heidio i’r Almaen y penwythnos yma.

Roedd nifer wedi dechrau paratoi am y daith cyn gwybod beth oedd tynged Cymru ac er gwaetha’r siom o golli mae rhai wedi parhau gyda’u cynlluniau.

'Gutted bod Cymru ddim yna'

Roedd Kevin a Lynwen Williams o Gaernarfon wedi prynu tocynnau awyren a bwcio gwestai yn yr Almaen pan gafodd dyddiadau a lleoliadau gemau Euro 2024 eu cyhoeddi fis Chwefror.

Ond pan gollodd Cymru yn erbyn Gwlad Pwyl fis Mawrth fe benderfynon nhw a’u ffrindiau lynu at eu cynlluniau. Am y bythefnos nesaf fe fyddan nhw'n dilyn y Pwyliaid i Hamburg, Berlin a Dortmund.

“Dwi’n hollol gutted bod Cymru ddim yna - a ninna' wedi dod mor agos efo penalties. Roeddan ni mor agos - dyna sy’n brifo,” meddai Kevin Williams, sy'n gobeithio cael tocyn i wylio un gêm, ond fel arall am ddilyn y pêl-droed ar sgrin fawr y cefnogwyr.

“Fydd yna deimlad o be’ fasa wedi gallu bod, a dwi’n mynd â tri crys Cymru fi a bucket hat - ond nawn ni fwynhau.

"Dwi erioed wedi bod yn yr Almaen - un o’r ychydig lefydd yn Ewrop dwi heb fod - a dwi erioed wedi bod i’r Ewros. Roeddan ni yn Efrog Newydd a Florida yn 2016.

“Felly dwi’n rili edrych ymlaen.”

'Sbort dilyn gwledydd eraill'

I griw o wyth o ffrindiau yn eu hugeiniau o ardal Caerdydd, dyma oedd eu cyfle cyntaf i fynd i’r Ewros ar ôl methu mynd yn 2016 oherwydd arholiadau TGAU a rheolau Covid yn Euro 2020.

Meddai Gareth Scourfield: “Mae’r Ewros nesa adra, sy’n grêt ond ddim yr un peth, mae’r Cwpan y Byd am fod yng Ngogledd America sy’n ddrud a pwy a ŵyr os fydd Cymru yno. Ac mae rŵan yn amser perffaith i ni.

“Pan wnaethon ni golli’r ffeinal roedden ni’n gutted ac am gwpwl o ddyddiau wnaethon ni jest pwdu ac wedyn wnaethon ni feddwl - ni wedi edrych ymlaen gymaint, ac mae mor agos, wnawn ni fynd.”

Ychwanegodd Mr Scourfield, sydd am gefnogi’r Iseldiroedd a’r Alban, ei fod wedi clywed am ambell un arall o Gymru sy’n mynd:

“Ffrind i ffrind a ffrind i deulu - gan fwya’ pobl wnaeth bwcio cyn i Gymru golli ac sydd rŵan yn dilyn Gwlad Pwyl.”

Gareth Scourfield a Griff Daniels ym maes awyr Standstead yn barod i ddal eu hawyren i'r Almaen

Dywedodd un arall o’r criw nad oedden nhw wedi gwneud trefniadau manwl tan ar ôl i Gymru golli yn rownd derfynol y gemau ail-gyfle. Oherwydd hynny maen nhw am fynd i Munich, Dusseldorf a Cologne yn hytrach na’r lleoliadau fyddai Cymru wedi chwarae.

Meddai Griff Daniels, o Bontypridd: “Yn amlwg dydi Cymru heb qualifiyo sy’n anffodus ond wnaethon ni feddwl ar yr ochr bositif a meddwl bod ganddon ni’r rhyddid i ddilyn timau gwahanol a heb y pwysau o orfod dilyn Cymru.

"Mi fydd yn sbort cael dilyn ffans gwledydd eraill.

“Wnaethon ni feddwl mae’n amser da i fynd i’r Almaen, beer capital Ewrop a gwylio pêl-droed efo ffrindiau tra 'da'n ni gyd yn 24 oed.”

Teimladau cymysg

Un Cymro sydd yn yr Almaen ers wythnos yn barod ydi Meic Parry o Gaerdydd, sydd yno fel peiriannydd sain llawrydd.

Fe gafodd gynnig gweithio yno i Radio 5 Live pan oedd Cymru dal gyda siawns o fynd i’r bencampwriaeth. Felly er ei fod o’n falch o gael bod yno - mae 'na deimladau cymysg.

Meic Parry yn Stadiwm Jena yn gwylio sgwad Lloegr yn ymarfer

“I fi yn bersonol ro’n i’n edrych ymlaen i Gymru fod yma,” meddai o Berlin. “Ro’n i’n gobeithio gallu cyfarfod efo 'chydig o bobl fydda wedi dod yma i ddilyn Cymru.

“Mae 'na griw dal yn dod drosodd yma i Berlin wythnos nesa - 20 Mehefin dwi’n meddwl.”

Petai Cymru wedi llwyddo byddai nifer o Gymry wedi dechrau cyrraedd y penwythnos yma ar gyfer y gêm gyntaf yn y grŵp - dydd Sul. Er hynny mae o wedi cyfarfod un Cymro sydd wedi cyrraedd yn gynnar:

“Neshi weld un Cymro yn ei grys Cymru pan o’n i’n cerdded o gwmpas Berlin diwrnod o’r blaen. Neshi ofyn o le oedd o’n dod - ‘I’m from a little town called Maesteg - do you know it?’ Roedd o ar ben ei hun y creadur.”