Cyhoeddi rhestr fer Gwobr Gerddoriaeth Gymreig 2024

Mae Cowbois Rhos Botwnnog, Georgia Ruth, Gruff Rhys a CHROMA ymhlith yr artistiaid sydd ar restr fer Gwobr Gerddoriaeth Gymreig 2024.

15 o artistiaid sydd wedi eu cynnwys ar y rhestr fer - gyda'r enillydd yn cipio gwobr ariannol o £10,000.

Llynedd Rogue Jones enillodd y wobr am eu halbwm, Dos Bebés, tra bod Dafydd Iwan hefyd wedi cael ei gydnabod am ei gyfraniad oes i gerddoriaeth yng Nghymru.

Bydd enillydd Gwobr Gerddoriaeth Gymreig 2024 yn cael ei gyhoeddi yng Nghanolfan Mileniwm Cymru nos Fawrth 8 Hydref - mewn seremoni fydd yn cael ei harwain gan gyflwynydd BBC Radio 1, Sian Eleri.

Mae Cowbois Rhos Botwnnog - enillwyr Gwobr Albwm Cymraeg y Flwyddyn 2024 gyda'u chweched albwm, Mynd â’r tŷ am dro - wedi eu cynnwys ar y rhestr fer.

Mae Georgia Ruth, sy'n briod â phrif leisydd Cowbois - Iwan Huws - hefyd ar y rhestr ar ôl rhyddhau ei phedwaredd albwm hi, Cool Head.

Gruff Rhys, enillydd y wobr yn 2011, yw un o'r enwau mwyaf sydd wedi eu henwebu eleni.

Ond mae sawl enw cyfarwydd i ddilynwyr cerddoriaeth iaith Gymraeg gyda Mellt, Chroma, HMS Morris ac Ynys i gyd ymhlith y 15.

Mae sawl genre gwahanol yn ymddangos ar y rhestr hefyd - gyda'r artist reggae, Aleighcia Scott, yr artist dawns electronig Elkka a'r band metel Skindred i gyd wedi eu cynnwys.

Fe enillodd Gruff Rhys y Wobr Gerddoriaeth Gymreig yn 2011

Cafodd y Wobr Gerddoriaeth Gymreig ei sefydlu yn 2011 gan y cyflwynydd Huw Stephens a'r ymgynghorwr cerddoriaet,h John Rostron, gyda phanel o farnwyr arbenigol o'r diwydiant yn dewis yr enillydd.

"Mae rhestr fer y Wobr Gerddoriaeth Gymreig eleni yn gasgliad gwych o albymau," meddai cyd-sylfaenydd y wobr, Huw Stephens.

"Mae artistiaid o Gymru’n parhau i greu gwaith hardd, arloesol a nodedig, sy’n mynd â’u cerddoriaeth ledled y byd.

"Rydyn ni’n ddiolchgar iawn i Cymru Greadigol am gefnogi’r wobr yma, y gall pob ffan cerddoriaeth yng Nghymru fod yn falch ohoni."

Beirniaid y wobr eleni oedd; Caroline Cullen, CassKid, Jude Rogers, Molly Palmer, Owain Elidir Williams, Sofia Ilyas a Tom Morgan.

Y rhestr fer yn llawn:

• Aleighcia Scott - Windrush Baby

• Angharad - Motherland

• Buzzard Buzzard Buzzard - Skinwalker

• CHROMA - Ask for Angela

• Cowbois Rhos Botwnnog - Mynd â'r tŷ am dro

• Elkka - Prism of Pleasure

• Georgia Ruth - Cool Head

• Gruff Rhys - Sadness Sets Me Free

• HMS Morris - Dollar Lizard Money Zombie

• L E M F R E C K - BLOOD SEWAT & FEARS

• Mellt - Dim Dwywaith

• Pys Melyn - Bolmynydd

• Skindred - Smile

• Slate - Deathless

• Ynys - Dosbarth Nos