Ysgolion ar gau wrth i amodau rhewllyd barhau yng Nghymru

Mae cynghorau a gwasanaethau brys yn annog gyrwyr a cherddwyr i bwyllo - dyma ffordd rewllyd yn Llanelwy

Mae degau o ysgolion ar gau eto ddydd Gwener wrth i dywydd rhewllyd barhau yng Nghymru.

Mae 29 o ysgolion ar gau yng Ngwynedd, 21 yn Sir Ddinbych a 12 yn Sir Conwy.

Mae rhai ysgolion ar gau hefyd yn Sir y Fflint, Ceredigion a Sir Gaerfyrddin oherwydd yr amodau rhewllyd.

Ond mae nifer o'r ysgolion yn nodi eu bod ar agor i ddisgyblion sy'n sefyll arholiadau ddydd Gwener.

Mae'r wybodaeth ddiweddaraf ar wefannau'r cynghorau sir unigol.

Dyma awgrym pa mor oer fuodd hi dros nos yn Llandegla, yn Sir Ddinbych

Bore oer yn ardal Llangollen fore Gwener

Roedd dau rybudd melyn am rew mewn grym fore Gwener - un ar gyfer mwyafrif Cymru a ddaeth i ben am 10:00 ac un ar gyfer mwyafrif siroedd y de a ddaeth i ben am 11:00.

Roedd dros 80 o ysgolion ar gau yng Nghymru ddydd Iau yn dilyn y noson oeraf y gaeaf yma hyd yn hyn.

Mae Heddlu Gogledd Cymru wedi annog unrhyw un sy'n bwriadu ymweld ag Eryri dros y penwythnos i sicrhau eu bod yn ymwybodol o'r peryglon a pharatoi'n gywir.

Daw wedi i gwpl a'u ci gael eu hachub o fynydd Carnedd y Filiast yn y Glyderau ddydd Iau ar ôl colli eu ffordd yn yr eira.

Roedd golygfeydd anhygoel wrth iddi wawrio fore Gwener, fel yma ym Metws Gwerful Goch yn Sir Ddinbych

Golygfa aeafol yn Ysbyty Ifan fore Gwener