Diogelwch yn y môr: Person osododd arwydd i arnofio yn 'arwr'

Katie Laurie (chwith) gyda Will Peckham, aeth hefyd i drafferthion yn Borth

Mae menyw aeth i drafferthion yn y môr yn 2022 wedi dweud fod arwydd yn atgoffa nofwyr i arnofio er mwyn goroesi wedi achub ei bywyd, a phwy bynnag wnaeth ei osod yn "arwr".

Yn ôl gwaith ymchwil newydd gan yr RNLI, byddai 73% o bobl yn anghofio ceisio arnofio yn lle nofio yn y môr mewn argyfwng.

Mae'r elusen yn ceisio annog pobl i ymweld â thraeth sydd ag achubwyr bywyd, ac i ddilyn ac ymarfer mesurau diogelwch yr RNLI.

Er bod disgwyl i'r tywydd oeri dros y diwrnodau nesaf, mae'r RNLI yn dal i ddisgwyl cynnydd mewn nifer yr ymwelwyr â'r arfordir ac yn ceisio addysgu cymaint o bobl a phosib am fesurau diogelwch.

Dywedodd llefarydd ar ran yr RNLI bod ymweld â thraethau gydag achubwyr bywyd yn bwysig iawn.

Aeth Katie Laurie i drafferthion ar draeth Borth yn 2022, pan gafodd ei llusgo allan i'r môr am 40 metr.

Meddai: "Roeddwn i'n mynd yn bellach ac yn bellach o'r lan ac roedd y cerrynt mor gryf. Roedd fel bod mewn peiriant golchi.

"Y cyfan y gallem ei wneud oedd ymladd digon i anadlu.

"Roeddwn i'n rhedeg allan o egni a chwilio am ffyrdd i beidio â marw, yna cofiais fy mod i wedi gweld arwydd gyda'r cyngor arnofio i fyw.

"Mae pwy bynnag a osododd yr arwydd hwnnw wrth fynedfa'r traeth yn arwr.

"Roeddwn i wedi blino'n lân erbyn i ni gael ein hachub. Dydw i ddim yn cofio llawer o'r daith yn ôl – erbyn hynny roeddwn i wedi blino'n lân.

"Pan ddes i allan o'r môr, allwn i ddim cerdded heb gymorth."

Cyngor ar sut i arnofio i fyw:

Cyngor yr RNLI i unrhyw un sydd mewn trafferth yn y dŵr yw arnofio i fyw:

• Gorwedd gydag eich pen yn ôl gan gadw eich clustiau o dan y dŵr

• Ymlacio a cheisio anadlu'n arferol

• Symud eich dwylo a'ch coesau i arnofio

• Mae pawb yn arnofio'n wahanol ac mae'r coesau yn gallu suddo rhywfaint

• Os oes gyda chi egni, ceisiwch chwifio eich dwylo neu alw am help neu nofio at y lan.

"Os ydych chi yn y môr, neu'n gweld rhywun arall mewn trafferth, ceisiwch eu hannog i arnofio," medd Tirion Dowsett

Fe ddywedodd Tirion Dowsett, sy'n Swyddog Diogelwch gyda'r RNLI, bod ystyried ymweld â thraethau sydd ag achubwyr bywyd yn hollbwysig.

Dywedodd fod "pethau yn gallu digwydd ar fyr rybudd ond ni'n ceisio annog pobl i wybod beth i'w wneud mewn argyfwng".

"Os ydych chi yn y môr, neu'n gweld rhywun arall mewn trafferth, ceisiwch eu hannog i arnofio.

"Mae mynd i draeth gydag achubwyr bywyd yn gwneud byd o wahaniaeth neu wrth gwrs ffonio'r bad achub," meddai.

Ychwanegodd ei bod hi'n bwysig hefyd i "ymarfer y sgiliau yma yn eich pwll nofio lleol fel eich bod yn gyfarwydd".