Cyhoeddi rhestr fer Gwobr Gerddoriaeth Gymreig 2025

Mae Adwaith, Buddug, Breichiau Hir, Melin Melyn a Sage Todz ymhlith yr artistiaid sydd ar restr fer y Wobr Gerddoriaeth Gymreig eleni.

Mae 15 o artistiaid wedi eu cynnwys ar y rhestr fer, gyda'r enillydd yn cipio gwobr ariannol o £10,000.

Y llynedd LEMFRECK enillodd y wobr am ei albwm, Blood, Sweat & Fears.

Bydd yr enillydd eleni yn cael ei gyhoeddi mewn digwyddiad yng Nghanolfan Mileniwm Cymru ar 6 Hydref - mewn seremoni fydd yn cael ei harwain gan gyflwynydd BBC Radio 1, Sian Eleri.

LEMFRECK enillodd y wobr y llynedd am ei albwm, Blood, Sweat & Fears

Mae Adwaith - enillwyr y wobr yn 2019 a 2022 - wedi eu cynnwys ar y rhestr fer gyda'u trydydd albwm, Solas.

Mae Gwenno - a enillodd y wobr yn 2015 - hefyd ar y rhestr ar ôl rhyddhau ei phedwerydd albwm hi, Utopia.

Yn ymddangos ar y rhestr fer am y tro cyntaf mae Panic Shack guda'u halbwm o'r un enw, Tai Haf Heb Drigolyn gydag Ein Albwm Cyntaf Ni, Buddug gyda Rhwng Gwyll a Gwawr, Siula gyda Night Falls on the World a Melin Melyn gyda Mill on The Hill

Mae sawl genre gwahanol yn ymddangos ar y rhestr hefyd, gyda'r artist rap, Sage Todz, a'r cynhyrchydd electronig Kelly Lee Owens - enillydd y wobr yn 2021 - wedi eu cynnwys.

Cafodd y Wobr Gerddoriaeth Gymreig ei sefydlu yn 2011 gan y cyflwynydd Huw Stephens a'r ymgynghorwr cerddoriaeth John Rostron, gyda phanel o farnwyr arbenigol o'r diwydiant yn dewis yr enillydd.

Beirniaid y wobr eleni ydy Sofia Ilyas, Roisin O'Connor, Molly Palmer, Zakia Sewell, Natalia Quiros Edmunds, Jude Rogers, Davie Morgan a Tim Jonze.

Y rhestr fer yn llawn

• Adwaith – Solas

• Buddug – Rhwng Gwyll a Gwawr

• Breichiau Hir - Y Dwylo Uwchben

• Cerys Hafana - Difrisg

• Don Leisure - Tyrchu Sain

• Gwenno - Utopia

• Kelly Lee Owens- Dreamstate

• KEYS – Acid Communism

• Melin Melyn – Mill On The Hill

• Panic Shack – Panic Shack

• Sage Todz – Stopia Cwyno

• Siula – Night Falls on the World

• Tai Haf Heb Drigolyn – Ein Albwm Cyntaf Ni

• The Gentle Good – Elan

• The Tubs – Cotton Crown

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.