Venue Cymru i dderbyn £10m gan Lywodraeth y DU wedi'r cwbl

Bydd y llyfrgell a'r Ganolfan Dwristiaeth leol yn cael eu symud i Venue Cymru, er mwyn creu hwb diwylliannol

Mae Llywodraeth y DU wedi cadarnhau y bydd Venue Cymru, Llandudno yn derbyn £10m yn dilyn pryderon na fyddai'r arian ar gael.

Roedd ofnau y byddai Venue Cymru, sy'n un o ganolfannau adloniant amlycaf y gogledd, yn colli nawdd ariannol sylweddol.

Ond mae'r llywodraeth bellach wedi cyhoeddi y bydd yr atyniad yn cael £10m o'r gronfa Codi'r Gwastad (Levelling Up).

Bydd yr arian yn cael ei wario ar adnewyddu'r ganolfan a symud gwasanaethau eraill yno.

Mae hynny'n cynnwys cynllun dadleuol i symud llyfrgell a Chanolfan Dwristiaeth y dref, er mwyn creu hwb diwylliannol.

Cyhoeddodd y llywodraeth hefyd y bydd Pont Gludo Casnewydd yn derbyn £5m o'r gronfa Codi'r Gwastad.

Mewn cyfarfod o un o gyfarfodydd Cyngor Sir Conwy ddechrau Ionawr, roedd yna gydnabyddiaeth gan gynghorwyr a swyddogion bod yr adeilad erbyn hyn yn edrych yn "llwm" ac yn "druenus"

Roedd yna gyhoeddiad fis Mawrth y llynedd y byddai Venue Cymru yn derbyn £10m o'r gronfa Codi'r Gwastad wedi i'r llywodraeth Geidwadol ddiwethaf yn San Steffan glustnodi £100m ar gyfer prosiectau diwylliannol.

Ond ers i'r Blaid Lafur ddod i rym ym mis Gorffennaf, roedd amheuon nad oedd yr arian bellach ar gael.

Wrth ymateb i'r cyhoeddiad y bydd y ganolfan yn cael £10m, dywedodd Jack Sargeant AS, Y Gweinidog Diwylliant, Sgiliau a Phartneriaeth Gymdeithasol fod hynny yn "newyddion arbennig i Venue Cymru ac i'r sector celfyddydau ac economaidd gogledd Cymru yn ehangach".

Bydd £5m yn cael ei wario er mwyn atgyweirio Bont Gludo Casnewydd

Fel rhan o'r cyhoeddiad ddydd Llun, bydd atyniad Pont Gludo Casnewydd yn derbyn £5m o'r gronfa Codi'r Gwastad.

Bydd yr arian yn cael ei wario er mwyn atgyweirio a chynnal a chadw'r bont, sy'n cael ei hystyried yn rhan allweddol o economi twristiaeth y de.

Y gobaith yw denu ymwelwyr i'r ddinas a rhoi hwb i swyddi yn lleol.

Wrth ymateb i'r cyhoeddiad dywedodd Aelod Seneddol Dwyrain Casnewydd, Jessica Morden fod "pobl o bob cwr yn caru'r bont gludo" a'i bod yn "rhan eiconig o Gasnewydd".

"Rydw i'n falch iawn gweld bod Llywodraeth Lafur y DU yn cydnabod pwysigrwydd twristiaeth yr ardal a bod buddsoddi yn y bont yn rhan hanfodol wrth sicrhau bod y safle yn atyniad i ymwelwyr am flynyddoedd i ddod."

Dywedodd Ysgrifennydd Cymru, Jo Stevens: "Mae Pont Gludo Casnewydd a Venue Cymru yn safleoedd eiconig yn eu cymunedau lleol ac rydw i'n falch y bydd arian gan Lywodraeth y DU yn rhoi hwb i dwristiaeth a diwylliant Cymru.

"Rydw i wrth fy modd bod gan Gymru ddwy lywodraeth Llafur sy'n blaenoriaethu twf economaidd fydd yn rhoi mwy o arian ym mhocedi pobl. Bydd y bartneriaeth hon yn parhau i wasanaethu pobl yng Nghymru."