"Dùinidh barrachd ghnothachasan"

Stephanie Burgon

Tha dragh ga nochdadh ann am Meadhan Earra-Ghàidheal gun tig air gnothachasan dùnadh is Comhairle Earra-Ghàidheal is Bhòid gus a bhith a' trusadh bheachdan mu chìs turasachd a chur an sàs san sgìre.

Bhòt an t-ùghdarras ionadail air a' mhìos a chaidh airson co-chonaltradh trì mìosan a chumail air moladh cìs 5% a chur air cosgais gach oidhche ann an àite aoigheachd.

'S iad na gnothachasan aoigheachd fhèin a bhiodh an urra ris a' chìs a thogail.

Tha Comhairle Earra-Ghàidheal is Bhòid ag ràdh gu bheil an àireamh de luchd-turais a tha a' tadhal 30 uimhir nas àirde na sluagh na sgìre is gu bheil seo a' cur uallach air bun-structar is seirbheisean.

Tha iad den bheachd gum faodadh cìs 5% air luchd-tadhail £9m a thogail gach bliadhna gus cosg air bun-structar is seirbheisean a leasachadh an dà chuid do mhuinntir an àite is luchd-tadhail.

Tha Earra-Ghàidheal is Bòd cuideachd am measg sgìrean far an deach èiginn taigheadais a ghairm ri linn cho gann 's a tha taighean aig prìs reusanta.

Ach tha cuid de ghnothachasan ag ràdh gum bu chòir don Chomhairle a bhith a' dèanamh barrachd gus luchd-turais a thàladh gu leithid Meadhan Earra-Ghàidheal, is iad ag ràdh gun cuireadh na planaichean a th' ann an tuilleadh uallaich agus chosgaisean air taighean-òsta agus taighean-aoigheachd.

"Cheannaich sinn Eaglais Chille Mhàrtainn na bu thràithe am-bliadhna mus robh bruidhinn sam bith ann air cìs turasachd," thuirt Stephanie Burgon, a bhios a' leigeil a-mach thaighean anns an sgìre.

"An smuain a bh' againn, 's e a bhith a' leudachadh a' ghnothachais againn."

Eaglais Chille Mhàrtainn

"Tha e sa bhaile, agus bidh sinn a' dèanamh mòran bhainnsean far am bi aoighean a bharrachd a dh'fheumas àiteachan-fuirich sa ghleann.

"Shaoil sinn gur e àite glè mhath a bhiodh anns an eaglais sam faigheadh barrachd aoighean air cadal, ach cuideachd àite a bhith againn far an tèid againn air tachartasan a chumail dhan choimhearsnachd.

"Gu mì-fhortanach, ma thig a' chìs a-steach, cha bhi sin comasach tuilleadh.

"Chan eil gu leòr air fhàgail aig deireadh an là, sa ghnothachas airson 5% a thoirt a-mach às. Chan obraicheadh e," thuirt i.

Chan ann air luchd nan taighean-òsta is aoigheachd a tha an dragh, ach cuideachd gnothachasan a tha ceangailte riutha, leithid taighean-bìdhe, cafaidhean is an leithid.

Tha Cathy McConaghy a' ruith an taighe-bhìdh Lulabelles air Tairbeart Loch Fìn, a' cleachdadh stuthan bìdh ionadail.

"Tha an àireamh de luchd-turais air tuiteam cha mhòr a dhà thrìan sa cheithir bliadhna mu dheireadh," thuirt i.

Cathy McConaghy

"Tha faireachdainn agam gun cuir cìs a bharrachd barrachd dhaoine dheth bho bhith a' tighinn.

"Bidh leithid de luchd-tadhail againn a' tha stuicte ri linn aiseagan a bhith air an cur dheth.

"Cha till na daoine sin dhan sgìre seo, agus a bhith a' cur na cìse seo air muin sin, cuiridh e barrachd dhaoine dheth, saoilidh mise," thuirt i.

Thuirt Comhairle Earra-Ghàidheal is Bhòid gun do dh'aontaich iad co-chonaltradh a chumail mar dhòigh air tomhais a dhèanamh air beachd choimhearsnachdan is gu bheil iad air èisteachd ri draghan a thog gnothachasan.

"Tha taic do ghnothachasan turasachd fa leth am measg nan rudan a dh'fhaodadh an sgeama a bhith a' ciallachadh gu practaigeach, agus dh'iarr sinn air gnothachasan innse dhuinn dè seòrsa taice a dh'iarradh iad nan deadh a' chìs air adhart," thuirt an t-ùghdarras ionadail.

"Feumaidh sinn a bhith gach cuid àrd-amasach agus ciallach mu shoirbheachas eaconomaidh turasachd Earra-Ghàidheal is Bhòid san ùine fhada.

An Tairbeart

"Tha an co-chonaltradh cuideachd a' faighneachd de dhaoine a tha an aghaidh na cìse, ciamar a dh'iarradh iad gun deadh maoineachadh a chumail ri seirbheisean do luchd-tadhail san àm ri teachd.

"Airson a bhith a' sìor thàladh dhaoine a bhith a' tadhal, feumaidh an sgìre na seirbheisean ris a bheil luchd-turais an dùil a thabhainn orra.

"Tha mòran de na seirbheisean seo air an cleachdadh le luchd-còmhnaidh na sgìre cuideachd, ach tha iad ann an cunnart le cho gann 's a tha maoineachadh poblach air an son.

"'S e aon roghainn a th' anns a' chead nàiseanta cìs a chur air luchd-turais airson teachd-a-steach a bharrachd fhaighinn a chumas taic ri seirbheisean a bhios luchd-turais agus muinntir an àite a' cleachdadh, agus airson an sgìre a chumail am measg nan sgìrean as tarraingiche ann an Alba.

"Cuiridh sinn fàilte air fiosrachadh air ais bho ghnothachasan agus bho na coimhearsnachdan againn nas fharsainne thar nan trì mìosan sam bi an co-chonaltradh a' dol, 's dùil gun tòisich e meadhan an Fhaoillich."

Gheibhear fiosrachadh mu dheidhinn an seo.

Thòisich Comhairle na Gàidhealtachd mar-thà air co-chomhairle air planaichean gus cìs 5% a chur air luchd-tadhail.

Thig sin gu ceann air an 31mh den Mhàrt.