Dragh às ùr mu ghainnead thaighean-beaga poblach san Eilean Sgitheanach

Tha dragh ann nach eil gu leòr thaighean-beaga san Eilean Sgitheanach agus Loch Aillse chan e a-mhàin do mhuinntir an àite ach do na mìltean luchd-turais a tha an sgìre a' tàladh.

Tha gu leòr de thaighean-bìdh ann agus tha faisg air 1,500 àite san Eilean Sgitheanach air an leigeil a-mach air màl do luchd-turais a bharrachd air pailteas de thaighean-òsta.

Ged a tha Comhairle na Gàidhealtachd air taighean-beaga poblach fhosgladh tha iad ag ràdh nach fheum iad sin a dhèanamh fon lagh agus gu bheil an sporran poblach gann.

Mar sin, tha iomairtean ionadail air a bhith a' dol airson a' bheàrn sin an goireasan poblach a lìonadh.

Bho chionn beagan bhliadhnaichean chuir Urras Phort Rìgh agus a' Bhràighe taighean-beaga aig a' chidhe sa bhaile le prìs ri pàigheadh airson an cleachdadh.

Ach chan eil e air soirbheachadh leotha mar a mhìnich Iona NicDhòmhnaill a tha ag obair don urras choimhearsnachd.

"Tha daoine 's dòcha ro mhodhail agus bidh iad a' cumail nan dorsan fosgailte do na daoine a tha a' tighinn às an dèidh," thuirt i.

Mar sin, dùnaidh na taighean-beaga aca aig deireadh na Dàmhair.

Tha Comhairle na Gàidhealtachd ag ràdh nach eil buidseat acasan airson an gabhail os làimh.

Nas fhaide deas chuireadh cachalaidh turnstile an sàs aig na taighean-beaga poblach san Ath Leathann agus sa Chaol airson dèanamh cinnteach gum pàigheadh gach duine airson na goireasan a chleachdadh.

Tha ceist air nochdadh an gabh na goireasan sa Chaol a chumail a' dol anns an ùine fhada ge-tà.

Tha Cathraiche Urras Coimhearsnachd a' Chaoil agus Loch Aillse, Magaidh Choineagan, ag ràdh gu bheil an togalach daor a ruith.

Thuirt i: "Tha e feumach mullach ùr agus làrach ùr agus an uidheamachd a thoirt gu ìre far a bheil i ag obrachadh fad na h-ùine.

"Tha e gu bhith na thrioblaid mhòr mura gabh leasachadh air choireigin agus tha sinn air iarrtas a chur chun na comhairle airson taic."

Dhùin an t-ùghdarras ionadail na taighean-beaga a bh' aca aig Cidhe Ùige san Lùnasdal.

Tha an t-ùghdarras ionadail fhathast a' ruith ghoireasan am meadhan Phort Rìgh, aig Bodach an Stòirr agus an Gleann Breatail.

Chan eil taighean-beaga idir ann aig cuid de na làraichean eile as motha a bhios a' tarraing luchd-turais, Rubha na h-Èisde nam measg.

Tha Comhairle na Gàidhealtachd ag ràdh nach eil dleasdanas laghail orra gum bi taighean-beaga poblach ann.

Tha Iona NicDhòmhnaill bho Urras Phort Rìgh agus a' Bhràighe ag ràdh gu bheil truas aice ri luchd-turais a dh'fhaodadh a bhith an èiginn.

Bidh na goireasan acasan aig cidhe a' bhaile a dhùnadh an ath-mhìos agus thuirt i gun cuireadh iad fàilte air gnìomhachas ionadail a bhiodh deònach na goireasan a ruith.