Dim penderfyniad eto ar ffawd Neil McEvoy

Ni wnaeth Plaid Cymru na Neil McEvoy sylw ar drothwy gwrandawiad disgyblu

Does dim penderfyniad wedi'i wneud eto ynglŷn â dyfodol Neil McEvoy fel aelod o Blaid Cymru.

Fe gafodd yr AC annibynnol ei ddiarddel o grŵp y blaid yn y Cynulliad ym mis Ionawr oherwydd yr hyn y gwnaeth llefarydd ei ddisgrifio fel "methiant ymddiriedaeth na ellir ei adfer".

Dywedodd Mr McEvoy ei fod wedi "cael ei orfodi" i adael y grŵp ac y byddai'n parhau i gynrychioli'r bobl wnaeth ei ethol.

Yn dilyn pum awr o drafod mewn gwrandawiad disgyblu ddydd Iau, ni chafodd penderfyniad ei wneud.

"Mae'r trafodaethau'n mynd rhagddynt. Ni allwn ddweud mwy ar y pwynt yma," meddai llefarydd ar ran Plaid Cymru.

Yn dilyn y gwrandawiad, dywedodd Mr McEvoy: "Does dim penderfyniad wedi'i wneud hyd yma. Bydd hynny'n cael ei wneud cyn gynted â phosib."

• Dileu trydariad bocsio McEvoy am Wood

• Neil McEvoy yn mynnu gweld e-byst gan ACau Plaid Cymru

• Plaid yn gwadu bod cwynion am Neil McEvoy wedi'u cydlynu

Fel mae pethau'n sefyll, mae'r AC Canol De Cymru yn dal yn aelod o Blaid Cymru, ond mae'r gwrandawiad yn delio â chwynion am ei ymddygiad.

Wedi newid i reolau'r blaid, does dim cynrychiolaeth gyfreithiol ar ran y naill ochr na'r llall.

Mae Plaid Cymru wedi trosglwyddo cwynion pellach i gomisiynydd safonau'r Cynulliad sydd heb benderfynu eto a fydd 'na ymchwiliad ffurfiol.