Pobl yn 'rhwystredig' am barc busnes gwag ger Abertawe

safle newyddCyngor Abertawe

Mae ffyrdd ac isadeiledd newydd wedi cael eu hadeiladu ar y safle bellach

Mae pryderon wedi eu codi ynglŷn â pharc busnes gafodd ei adeiladu ar safle hen waith tun yn Abertawe sy'n parhau i fod yn wag.

Dywedodd AC Plaid Cymru, Dai Lloyd fod £11m wedi ei wario ar Barc Felindre, ond bod trigolion yn rhwystredig nad oedd unrhyw beth yn digwydd yno.

Ychwanegodd yr AC Ceidwadol, Suzy Davies fod angen sicrwydd y byddai modd adfer y buddsoddiad.

Dywedodd yr Ysgrifennydd Cyllid, Mark Drakeford fod swyddogion wedi bod yn ceisio denu pobl i'r safle.

'Ceisio denu tenantiaid'

Yn 2010 fe gyhoeddwyd y byddai arian o Lywodraeth Cymru ac Ewrop yn cael ei wario ar y safle.

Roedd hynny'n cynnwys ffordd fewnol newydd a darparu trydan, nwy, dŵr, dreiniau, goleuadau a chyswllt band eang cyflym.

Ond codwyd pryderon ar y pryd y byddai'n anodd canfod tenantiaid i'r safle.

Wrth siarad yn y Senedd ddydd Mercher dywedodd Mr Lloyd, AC Gorllewin De Cymru: "Ers diwedd y gweithfeydd dur yn yr ardal, rydyn ni wedi gweld sawl cynllun i ddenu busnes i'r parc lleol yna, ond mae e dal yn wag.

"Mae rhwystredigaeth yn lleol am y datblygiadau yn y parc yma sydd â'r potensial i greu cannoedd o swyddi."

Google

Cafodd rhywfaint o arian Ewropeaidd ei ddefnydio i fuddsoddi ym Mharc Felindre

Dywedodd Ms Davies, sydd yn AC dros yr un rhanbarth: "Dwi'n meddwl fod angen rhyw fath o sicrwydd, yn enwedig yn fy ardal i, nad yw hwn yn Kancoat neu Technium arall.

"Dwi'n meddwl fod angen rhywfaint o sicrwydd fod modd adfer y buddsoddiad."

Dywedodd Mr Drakeford ei fod yn siŵr y byddai Ysgrifennydd yr Economi, Ken Skates eisiau "sicrhau bod enillion go iawn i'r cyhoedd o'r buddsoddiad sydd wedi'i wneud ar y safle".

"Rydyn ni wedi bod yn ceisio denu pobl i'n helpu ni i ddatblygu'r safle," meddai.

Ychwanegodd: "Mae safon y datblygwyr a'r tenantiaid sydd wedi mynegi diddordeb yn y lleoliad yn galonogol, ac mae fy nghydweithiwr Ken Skates yn awyddus i symud ymlaen fel bod modd goresgyn y trafferthion sydd wedi'u hamlygu gan Dr Lloyd."