Ysgol Carno: Pave Aways yn adeiladu'r ysgol newydd
- Cyhoeddwyd
Mae disgyblion Ysgol Carno wedi derbyn eu haddysg mewn dosbarthiadau symudol ers 1992.
Mae gwaith adeiladu ysgol newydd yng Ngharno wedi dechrau ar ôl i Gyngor Powys roi cytundeb i gwmni Pave Aways o Groesoswallt.
Ar hyn o bryd, mae disgyblion Ysgol Gynradd Carno yn cael eu dysgu mewn dosbarthiadau symudol dros dro.
Yn ogystal ag adeiladu ysgol gynradd newydd, bydd y cwmni yn adnewyddu rhannau o Ysgol Glantwymyn, fel rhan o brosiect gwerth £2.8m.
Mae aelod cabinet y cyngor ar faterion addysg yn canmol y cytundeb, gan ddweud bod modd i ysgolion gwledig y sir "ffynnu mewn cyd-destun modern".
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Mae'r gwaith adeiladu bellach wedi dechrau a'r gobaith yw gweld disgyblion yn derbyn eu haddysg yn yr adeilad newydd yn Ionawr 2019.
Bydd y gwaith adnewyddu i Ysgol Glantwymyn yn cynnwys ychwanegu cyfleusterau tai bach i'r anabl a gwelliannau i'r maes parcio.
Bydd y gwaith yn cael ei ariannu gan Gyngor Powys a Llywodraeth Cymru.
Dyfodol ysgolion gwledig
Mae'r ddwy ysgol, ynghyd ag Ysgol Llanbrynmair, yn rhan o ffederasiwn o ysgolion, sy'n golygu bod y tair ysgol yn rhannu'r un corff llywodraethu a phennaeth.
Cafodd y ffederasiwn ei chreu yn 2013 yn dilyn brwydr i gadw Ysgol Carno ar agor.
Dywedodd yr aelod cabinet â chyfrifoldeb am addysg, y Cynghorydd Myfanwy Alexander: "Trwy'r ffederasiwn, mae modd dangos bod ysgolion bach cefn gwlad yn gallu ffynnu mewn cyd-destun modern.
"Rydym yn falch i fod yn adeiladu ysgol bentref, sy'n dangos ein hymrwymiad i ddwy ran o dair o drigolion Powys sy'n byw yng nghefn gwlad."
Mae cwmni Pave Aways hefyd wedi addo defnyddio is-gontractwyr lleol i wneud y gwaith.