Heddlu sy'n chwilio am athrawes yn canfod corff ar draeth

Mae'r heddlu wedi apelio am wybodaeth am Siwan Ellis

Mae'r heddlu sy'n chwilio am athrawes o Abertawe sydd wedi bod ar goll o'i chartref wedi dod o hyd i gorff ar benrhyn Gŵyr.

Dywedodd llefarydd ar ran Heddlu De Cymru iddynt gael eu galw i Fae Caswell am tua 16:00 ddydd Iau gan aelod o'r cyhoedd.

Ychwanegodd nad oedd y corff wedi ei adnabod yn ffurfiol, ond eu bod wedi rhoi gwybod i deulu Siwan Ellis.

Mae Ms Ellis, 53 oed a chyn-athrawes yn Ysgol Gyfun Gymraeg Bryn Tawe ac Ysgol Bishop Gore, wedi bod ar goll ers dydd Llun.