Caerdydd yn denu Bacuna wedi cyfnod trosglwyddo anodd

Ar ddiwrnod olaf y cyfnod trosglwyddo mae Clwb Pêl-droed Caerdydd wedi arwyddo chwaraewr canol cae Reading, Leandro Bacuna am ffi o £4m.

Mae Bacuna, gynt o Aston Villa, hefyd yn gallu chwarae fel amddiffynnwr de - un o'r safleoedd roedd y rheolwr, Neil Warnock yn benderfynol o'i gryfhau.

Hefyd mae'r Adar Gleision wedi arwyddo'r ymosodwr ifanc, Danny Williams, o Hwlffordd ond mae disgwyl iddo ymuno â'r garfan dan-23.

Mae cyfnod trosglwyddo eleni wedi bod yn anodd ac anarferol i'r clwb wedi diflaniad yr ymosodwr, Emiliano Sala.

Roedd chwaraewyr Caerdydd yn gwisgo cennin Pedr ar eu crysau yn eu gêm yn erbyn Arsenal nos Fawrth i ddangos cefnogaeth wedi diflaniad Emiliano Sala.

Ar ôl ymdrechu am wythnosau i'w ddenu o glwb Nantes, fe ymuodd yr Archentwr â Chaerdydd am ffi o tua £15m ar Ionawr 19, gan dorri record y clwb.

Ddeuddydd yn ddiweddarach fe ddiflannodd awyren fechan y roedd Sala yn teithio arni dros Fôr Udd wrth iddo adael Ffrainc a pharatoi i hyfforddi gyda'i dîm newydd.

Yn dilyn gwaith chwilio eang mae'r Gangen Ymchwilio Damweiniau Awyr bellach yn credu eu bod nhw wedi darganfod rhannau o sedd o'r awyren.

• Caerdydd yn arwyddo ymosodwr o Everton

• Caerdydd yn arwyddo Sala o Nantes

Mae Niasse wedi chwarae dwy gêm i'r Adar Gleision ers ymuno â'r clwb

Fe ymunodd Sala â'r clwb yn fuan wedi i'r Adar Gleision gyhoeddi bod Oumar Niasse wedi ymuno ar fenthyg o Everton am weddill y tymor.

Mae gan Gaerdydd yr opsiwn i brynu'r ymosodwr ar ddiwedd y tymor am ffi o £7m.

Er i Gaerdydd gael eu cysylltu gyda sawl chwaraewr arall dros y mis diwethaf, gan gynnwys Nathaniel Clyne, Adrien Tameze ac Almamy Touré, ni ddaeth un rhywbeth cadarn o'r sibrydion hynny.