Gweithdai rygbi yn gais i ddenu 3,000 o ferched i chwarae

Rygbi

Dywedodd disgyblion Ysgol Bro Edern bod y gweithdai yn gyfle gwych i wneud ffrindiau ac i ddeall mwy am y gêm

Mae dros 3,000 o ferched o dros Gymru wedi cael blas ar rygbi wrth i Undeb Rygbi Cymru gynnal gweithdai arbennig dros yr wythnos diwethaf.

Bwriad Rookie Rugby ydy galluogi merched oed cynradd ac uwchradd i gadw'n heini a rhoi cynnig ar y gamp.

Yn ôl hyfforddwr, fe all y cynllun greu'r llwybrau i "sêr y dyfodol".

Dywedodd Undeb Rygbi Cymru eu bod yn gobeithio i'r gweithdai annog mwy o ferched i fod â diddordeb hirdymor yn y gamp.

Dros y dyddiau diwethaf cafodd disgyblion o bob oedran gyfle i ymgynnull mewn ymarferion rygbi ar draws Cymru.

Yn ôl Geraint John o Undeb Rygbi Cymru, bwriad y gweithdai ydy annog merched i "gadw'n heini ac yn iach".

Dywedodd Mr John: "Ni moyn iddyn nhw fynd adre' a dweud wrth eu mamau a tadau eu bod nhw wedi chwarae tipyn bach o rygbi.

"Bydde'n braf clywed nhw'n siarad yn yr ysgol yn trafod y gêm, efallai eu gweld nhw yn yr Arms Park mewn pythefnos pan fydd Cymru yn chwarae Lloegr."

'Cyfle arbennig'

Dywedodd Elin a Beca bod y sesiwn wedi eu hysbrydoli i barhau i chwarae'r gêm

I ddwy disgybl o Ysgol Bro Edern, Caerdydd, roedd y gweithdai yn gyfle i greu "ffrindiau" a "sgiliau newydd".

"Dwi'n gobeithio eu defnyddio [y sgiliau] yn y dyfodol. Gobeithio rhyw ddydd cael chwarae i glwb," meddai Elin.

Cai Milsom, Swyddog Hwb Rygbi Ysgol Bro Edern oedd yn gyfrifol am fynd a'r merched i'r gweithdy.

Dywedodd nad oedd llawer o'r merched heb "afael mewn pêl-rygbi" cyn mynychu.

Dywedodd ei fod yn gyfle i'r rhai oedd ddim yn hoffi "campau traddodiadol" i roi cynnig ar gamp wahanol.

"Mae hwn yn gyfle arbennig falle iddyn nhw fynd mewn i rygbi yn y pendraw.

"Mae Tîm Rygbi Merched Cymru yn ifanc ac mae angen gwthio'r merched yma i fod yn sêr y dyfodol," meddai.

Fe fydd Tîm Merched Rygbi Cymru yn herio Yr Eidal nos Sadwrn 9 Chwefror am 19:00.

Straeon perthnasol