Y clwb pêl-droed o'r Almaen sy'n hybu'r Gymraeg
- Cyhoeddwyd
Ar ddiwedd Ionawr daeth y newyddion bod y Cymro ifanc o Gaerdydd, Rabbi Matondo, yn ymuno â chlwb pêl-droed Schalke 04 yn Yr Almaen.
Gadawodd Matondo, sy'n 18 oed, Manchester City er mwyn ceisio gwneud enw i'w hun yn y Bundesliga, prif adran Yr Almaen.
Ond ers i Rabbi symud i Gelsenkirchen (y ddinas lle mae Schalke 04 wedi'i leoli), mae'r clwb wedi bod yn hyrwyddo'r Gymraeg ar un o'u cyfrifon Twitter, Schalke 04 USA.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Siaradodd Cymru Fyw gyda Thomas Spiegel, pennaeth cyfryngau a chysylltiadau cyhoeddus Schalke 04.
"Fe ddechreuon ni drydar yn Gymraeg pan wnaeth Rabbi Matondo arwyddo i Schalke 04. Roedden ni'n gwybod y byddai sylw llawer o Gymry yn troi at y clwb, ac o ganlyniad, ein cyfrifon cyfryngau cymdeithasol," meddai.
"Rydyn ni'n gwybod bod negeseuon amlieithog yn gwneud yn dda gyda chefnogwyr o ardaloedd lleol y chwaraewyr.
"Fe wnaethon ni drydar 'Croeso i Schalke' yn spontaneous - syniad ein asiantaeth MMC oedd hyn. Roedden ni'n gobeithio y byddai'n cael dipyn o sylw, ond roedd yn syndod i ni gymaint roedd pobl yn ei hoffi.
"Fe wnaeth hynna roi'r syniad i ni wneud #DailyWelsh er mwyn cario 'mlaen a meithrin y berthynas gyda chefnogwyr newydd."
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Felly ydy cefnogwyr pêl-droed Yr Almaen yn ymwybodol o Rabbi? Beth maen nhw'n feddwl?
"Wrth gwrs! Mae'r cefnogwyr wedi sylwi bod lot o chwaraewyr ifanc dawnus yn dod o Ynysoedd Prydain," meddai Thomas. "Ond bod nhw efallai ddim yn cael y profiadau.
"Mae'r Sais ifanc Jadon Sancho bellach yn un o'r chwaraewyr mwyaf cyffrous yng nghlwb Borussia Dortmund, ac mae Bayern (Munich) i'w weld â diddordeb yn Callum Hudson-Odoi (o Chelsea).
"Felly mae pobl yma wedi bod yn agored iawn i'r syniad o arwyddo bachgen yn ei arddegau o Manchester City.
"Mae angen i Rabbi addasu i'r Bundesliga, a dwi'n siŵr y bydd gydag amser. Bydd yn cael amser ar y cae gyda Schalke, ac mi fydd yn gwella yn sgil hynny. Mae ei gyflymdra wir yn creu argraff."
Os bydd Rabbi yn creu argraff efallai y bydd prif gyfrif Twitter Schalke 04 yn trydar yn gyson yn Gymraeg, meddai Thomas: "Pan fydd Rabbi yn sgorio gôl fuddugol mewn gêm am y tro cyntaf, mae'n debyg bydd y tweet sydd i ddilyn yn Gymraeg!"
Y Veltins-Arena yn Gelsenkirchen, cartref newydd Rabbi Matondo
Eleni mae Schalke wedi cyrraedd rownd yr 16 olaf yng nghystadleuaeth Cynghrair y Pencampwyr, lle maen nhw'n wynebu cyn-glwb Rabbi, Manchester City, dros ddau gymal.
Ond beth am unrhyw sêr eraill o Gymru - pwy arall sy'n creu argraff yn Schalke?
"Dwi ddim am ddechrau unrhyw transfer rumours yma! 😉" meddai Thomas Spiegel.
"O safbwynt cefnogwr pêl-droed, roedd Cymru yn wych yn ystod Euro 2016. Gareth Bale oedd y seren gyda Aaron Ramsey yn ail agos. Ond yn hanesyddol wrth gwrs mae Ryan Giggs, Ian Rush a Mark Hughes yn dod i'r meddwl."
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
"Cafodd Schalke 04 ei sefydlu gan feibion i lowyr ar ddechrau'r ugeinfed ganrif. Mae'r diwydiant glo wedi gadael ei ôl ar y clwb a'r ardal gyfan.
"Fel teyrnged i hyn mae'r clwb dal yn defnyddio'r cyfarchiad y byddai glowyr yn ei ddefnyddio, 'Glück auf!' sy'n golygu y byddai'r gweithwyr yn dychwelyd adref yn saff wedi eu shifft yn gweithio dan ddaear. Beth fyddai hynny yn Gymraeg tybed?"
Felly, mewn rhyfedd o fyd mae'r bachgen o dde Cymru'n symud i glwb sydd â'r diwydiant pyllau glo wrth galon ei hunaniaeth. Cawn weld dros y misoedd nesaf os Bydd Rabbi'n creu argraff yn y Bundesliga.
Matondo ac un o amddiffynwyr Fortuna Duesseldorf, Kevin Stoeger, Chwefror 6, 2019.