Gwerth Bagloriaeth Cymru'n ddibynnol ar y dysgu, medd ACau

Mae'r pwyllgor wedi cynnwys 10 o argymhellion yn ei adroddiad

Er bod nifer yn feirniadol o Fagloriaeth Cymru, gallai fod yn gymhwyster gwerthfawr os caiff ei chyflwyno'n effeithiol, yn ôl Aelodau Cynulliad.

Dydy rhai ysgolion ddim yn gweld gwerth y cymhwyster, meddai'r Pwyllgor Plant, Pobl Ifanc ac Addysg, ac maen nhw'n credu ei fod yn cymryd llawer o amser i gwblhau.

Dangosodd arolwg fod dau draean o ddisgyblion a rhieni gafodd eu holi o'r farn nad yw'r Fagloriaeth yn debygol o gael effaith ar yrfaoedd pobl ifanc.

Mae'r pwyllgor am weld eglurder gan Lywodraeth Cymru am ei gweledigaeth ar gyfer Bagloriaeth Cymru a'r disgwyliadau a'r adnoddau sydd eu hangen i'w chyflawni.

• Galw am beilota cymhwyster Cymraeg newydd

• Deddf Addysg Gymraeg yn 'hanfodol'

Un pryder a godwyd gan bobl ifanc yw bod pwysau ymgymryd â Bagloriaeth Cymru yn ychwanegu straen ar adeg pan oeddent eisoes yn wynebu pwysau cyrsiau neu arholiadau eraill.

Roedd nifer o'r farn na ddylai'r cymhwyster fod yn orfodol, ac yn ôl y pwyllgor, mae polisi Llywodraeth Cymru ar y mater yn aneglur.

'Anghysondeb'

Mae diffyg dealltwriaeth ymhlith cyflogwyr o ran diben y cymhwyster, meddai'r pwyllgor, sydd hefyd yn galw am godi ymwybyddiaeth ymysg busnesau a phrifysgolion.

Un o'r argymhellion eraill yw bod Llywodraeth Cymru yn darparu rhestr gynhwysfawr o'r prifysgolion hynny sy'n derbyn Bagloriaeth Cymru yn eu cynigion.

Mae'r ffordd caiff y cymhwyster ei ddysgu yn "bryderus o anghyson" ar draws Cymru, yn ôl Lynne Neagle

Ychwanegodd yr adroddiad bod tystiolaeth o anghysondeb yn y ffordd caiff y cymhwyster ei gyflwyno ar draws Cymru.

Serch hynny, mae'r pwyllgor o'r farn bod y Fagloriaeth yn cynnig sgiliau ar gyfer dysgu a chyflogadwyedd yn y dyfodol na fyddent, fel arall, yn cael eu datblygu dan gymwysterau mwy traddodiadol.

'Pryderus o anghyson'

Dywedodd Lynne Neagle AC, Cadeirydd y Pwyllgor Plant, Pobl Ifanc ac Addysg, bod "diffyg dealltwriaeth o ddiben a chynnwys y cymhwyster, a'r anghysondeb wrth ei darparu" wedi cyfrannu at brofiadau "negyddol" rhai disgyblion.

"Daethom i'r casgliad bod y ffordd y mae'r cymhwyster yn cael ei ddarparu ar hyn o bryd, a'r cyhoeddusrwydd o'i amgylch yn cael effaith niweidiol ar ei werth gwirioneddol a thybiedig," meddai.

"Mae'r canolfannau dysgu yn parhau i fod yn bryderus o anghyson, ac mae dyblygu ymdrech a gofynion asesu na ellir eu rheoli yn arwain at athrawon a dysgwyr sydd wedi cael digon."

Ond nododd Ms Neagle bod gwerth mewn astudio'r Fagloriaeth a'i fod yn gallu ychwanegu at sgiliau a phrofiadau dysgwyr.

Bydd yr adroddiad nawr yn cael ei drafod gan Lywodraeth Cymru.