Arestio bachgen 14 oed wedi marwolaeth Carson Price, 13

Bu farw Carson Price, 13, nos Wener diwethaf

Mae'r heddlu wedi arestio bachgen 14 oed mewn cysylltiad â marwolaeth Carson Price yn Ystrad Mynach.

Cafodd y bachgen 14 oed ei arestio ar amheuaeth o gyflenwi cyffuriau dosbarth A.

Bu farw Carson Price, 13, nos Wener ar ôl iddo gael ei daro yn wael mewn parc yn Ystrad Mynach.

Dywedodd y Ditectif Uwch-Arolygydd Alun Davies: "Ers digwyddiadau trasig nos Wener mae ein tîm ymchwilio wedi bod yn dilyn sawl trywydd ynglŷn â marwolaeth Carson Price.

"O ganlyniad, y bore yma, fe weithredodd swyddogion arbenigol o Heddlu Gwent warant o dan y Ddeddf Camddefnyddio Cyffuriau, ym Mhontllanffraith, Y Coed Duon.

"Mae bachen 14 oed o'r ardal wedi cael ei arestio dan amheuaeth o gyflenwi cyffuriau dosbarth A.

"Ar hyn o bryd mae yn y ddalfa ac yn cael ei holi yng ngorsaf yr heddlu yng Nghasnewydd."