Saethu Llanbedrog: Dyn yn euog o ddynladdiad Peter Colwell
- Cyhoeddwyd
![Peter Colwell](https://ichef.bbci.co.uk/news/976/cpsprodpb/7F47/production/_107238523_3178e44a-d403-484f-b413-d15afa796169.jpg)
Bu farw Peter Colwell ar ôl cael ei saethu mewn cerbyd yn Llanbedrog
Mae un dyn wedi ei gael yn euog o ddynladdiad ar ôl i ddyn ifanc gael ei saethu yng Ngwynedd.
Bu farw Peter Colwell, 18, yn Chwefror 2017 ar ôl cael ei saethu mewn cerbyd y tu allan i dafarn Y Llong yn Llanbedrog, ger Pwllheli.
Ddydd Mawrth cafwyd perchennog y gwn laddodd Mr Colwell, Ben Wilson, 29, yn euog o'i ddynladdiad drwy esgeulustod dybryd.
Cafwyd Ben Fitzsimons, 23, yn ddieuog o'r un cyhuddiad yn Llys y Goron Caernarfon.
'Dedfryd o garchar'
Mewn gwrandawiad blaenorol cafwyd Fitzsimons yn euog o fod â gwn wedi'i lwytho mewn man cyhoeddus, ac fe wnaeth Wilson hefyd bledio'n euog i'r un cyhuddiad.
Bydd y ddau yn cael ei ddedfrydu ddydd Iau.
Dywedodd y Barnwr Rhys Rowlands y dylai'r pâr "baratoi eich hunan ar gyfer dedfryd o garchar".
Cafodd Peter Colwell ei saethu mewn cerbyd y tu allan i dafarn Y Llong yn Llanbedrog
Clywodd yr achos bod Wilson a Fitzsimons wedi treulio noson 5 Chwefror yn yfed gyda Mr Colwell a dau arall, gan deithio i wahanol dafarndai mewn Land Rover Discovery.
Yn ôl yr erlynydd Patrick Harrington roedd y gwn, oedd wedi ei lwytho, yn sedd flaen y cerbyd yn pwyntio tuag at y sedd gefn.
Pan ddychwelodd y grŵp i'r car, roedd Fitzsimons yn eistedd yn y sedd flaen, gyda Mr Colwell yn eistedd yng nghanol y sedd gefn.
"O fewn ychydig o amser, cafodd y gwn ei saethu," yn ôl Mr Harrington.
Cafodd Mr Colwell ei ladd "yn syth" gan ergyd i'w ben.
Clywodd y llys hefyd nad oedd y farwolaeth yn un bwriadol na maleisus.
Straeon perthnasol
- Cyhoeddwyd5 Mehefin 2019