Gêm galed i Gymru wrth baratoi am Gwpan y Byd yn Japan

Roedd hi'n brynhawn rhwystredig i Alun Wyn Jones a gweddill chwaraewyr Cymru

Mae record ddiguro Cymru wedi dod i ben gyda cholled yn erbyn Lloegr wrth i'r garfan baratoi ar gyfer pencampwriaeth Cwpan y Byd yn Japan, sy'n dechrau mis nesaf.

Roedd Cymru'n ffefrynnau i ennill wrth gyrraedd Twickenham wedi rhediad 14 o gemau heb golli.

Ond fe gafodd Lloegr y gorau o'r chwarae o bell ffordd yn chwarter cyntaf y gêm ac wedi pedwar o funudau yn unig roedden nhw saith pwynt ar y blaen wedi cais Billy Vunipola a throsiad George Ford.

10 munud yn ddiweddarach roedd tîm Eddie Jones â mantais o 14 o bwyntiau, wedi i Joe Cokanasiga dirio ac ail drosiad Ford.

Sgoriodd Gareth Davies gais unigol gwych yn yr hanner cyntaf

Daeth pwyntiau cyntaf Cymru wedi 22 o funudau, diolch i gais unigol gwych gan Gareth Davies.

Llwyddodd y mewnwr i godi'r bêl o gefn y sgrym gan gamu heibio tri o amddiffynwyr Lloegr ac osgoi ymdrech Elliot Daly i'w atal cyn tirio.

Gyda throsiad llwyddiannus Gareth Anscombe roedd y sgôr yn 14-7.

Fe adawodd Gareth Anscombe y cae wedi ychydig dros hanner awr ar ôl cael anaf

Roedd Gatland wedi dweud cyn y gêm bod yna le i feirniadu'r penderfyniad i chwarae gymaint o gemau paratoadol cyn Cwpan y Byd oherwydd y posibilrwydd o anafiadau i aelodau'r garfan.

Ac roedd yna olwg bryderus ar ei wyneb pan gafodd Anscombe anaf i'w ben-glin a gorfod gadael y cae wedi 34 o funudau gyda chymorth staff meddygol.

Dan Biggar ddaeth i'r maes yn ei le.

Roedd munud olaf yr hanner cyntaf yn un hunllefus wedyn i gapten Cymru, Alun Wyn Jones yn ei 135ain gêm ryngwladol.

Llithrodd y bêl trwy ei fysedd wedi tafliad o lein Cymru gan lanio'n daclus i fachwr Lloegr, Luke Cowan-Dickie oedd ond ag ychydig o fedrau i redeg cyn tirio.

Wedi trydydd trosgais Lloegr roedd y sgôr yn 21-7 ar yr egwyl.

Alun Wyn Jones bellach yw'r chwaraewr o Gymru sydd â'r nifer fwyaf o gapiau rhyngwladol - 135, sef 126 i Gymru a naw i'r Llewod - ar ôl arwain ei dîm i'r maes yn Twickenham

Roedd yna batrwm tebyg i'w ail hanner, gyda Chymru wastad yn ceisio cau'r bwlch.

Roedd yna geisiadau gan George North ac Alun Wyn Jones a throsiad gan Biggar ond fe wnaeth ciciau cosb Ford a gôl adlam Elliot Daly olygu mai 33-19 oedd y sgôr derfynol.

Methu felly wnaeth Cymru i sicrhau 15fed buddugoliaeth o'r bron - canlyniad sydd hefyd yn golygu na fydd Cymru'n bachu safle rhif un ar restr detholion y byd.

Roedden nhw ar y brig yn answyddogol am dros 24 awr wedi i Seland Newydd golli i Awstralia, ac fe fyddai hynny wedi ei gadarnhau'n swyddogol petaen nhw wedi osgoi colli yn erbyn Lloegr.

Bydd yna ddigon i Gatland a gweddill y tîm hyfforddi gnoi cil arno cyn i'r ddau dîm gwrdd eto yng Nghaerdydd ddydd Sadwrn nesaf, gan gynnwys osgoi camgymeriadau wrth drin y bêl.

Ond fe fydd yna aros eiddgar i weld beth yw cyflwr Anscombe wrthi iddo adael Twickenham ddydd Sul ar faglau.