Cyhuddo dyn lleol wedi ymosodiad yn Llanelli

Fe wnaeth Ryan Matthew Edgington ymddangos ger bron Llys Ynadon Llanelli fore Mercher

Mae dyn wedi cael ei gyhuddo o achosi niwed corfforol difrifol yn dilyn ymosodiad yn Llanelli dros y penwythnos.

Cafodd y gwasanaethau brys eu galw i'r digwyddiad yn ardal Pemberton y dref am tua 20:00 ddydd Sadwrn, 10 Awst.

Fe gafodd dyn 53 ei gludo i Ysbyty Athrofaol Cymru, Caerdydd wedi'r digwyddiad - ac mae'r gŵr yn parhau mewn cyflwr difrifol.

Cafodd Ryan Matthew Edgington, 24 oed o Lys Cilsaig, Dafen, ei gyhuddo o achosi niwed corfforol difrifol a gwir niwed corfforol yn Llys Ynadon Llanelli fore Mercher.

Bydd Mr Edgington yn parhau yn y ddalfa tan iddo ymddangos yn Llys y Goron Abertawe ar 13 Medi.

Mae dau ddyn arall a gafodd eu harestio mewn cysylltiad â'r digwyddiad bellach wedi cael eu rhyddhau ar fechnïaeth.

Mae Heddlu Dyfed Powys yn dal yn gofyn i unrhyw un oedd yn dyst i'r digwyddiad i gysylltu â nhw drwy ffonio 101.