Tips bywyd coleg i fyfyrwyr newydd
- Cyhoeddwyd
Mae Nest a Jacob yn mynd i'w trydydd blwyddyn ym Mhrifysgol Caerdydd
Beth yw hanfodion bywyd coleg? Mae hi'n Wythnos y Glas yn llawer o golegau Cymru felly dyma fyfyrwyr trydydd blwyddyn Prifysgol Caerdydd a chyflwynwyr XPress Radio, Nest Jenkins a Jacob Morris, yn siarad o brofiad.
Blynyddoedd coleg, yw'r blynyddoedd gorau.
Fel myfyrwyr sydd ar fin mentro i'n trydedd flwyddyn does dim byd yn cymharu â bod yn fyfyriwr. Er, fe ddaw'r tair blynedd â'i heriau o goginio, cyd-fyw ynghyd â wynebu ambell ddarlith ben bore gyda chur pen!
Felly, dyma gyngor i'r sawl sydd yn hedfan y nyth, gadael Mam a Dad ac ymgodymu â byw'n annibynnol am y tro cyntaf.
Pasta
Wedi holl tecawês a bwyd brys Wythnos y Glas, mae'n bryd cyfarwyddo â realiti, hynny yw 'realiti myfyriwr'.
Prin fod yr un myfyriwr yn hoff o slafio yn y gegin felly dewiswch fwydydd sy'n hawdd i'w paratoi. Heb os, pasta yw eich ffrind gorau.
Mae Jacob a Nest yn cyflwyno rhaglen Crac y Wawr ar XPress Radio ac maen nhw wedi cyflwyno rhaglenni ar Radio Cymru hefyd
Os ydych chi'n dynn ar amser neu'n methu â goddef gwres y gegin, dim ond ychwanegu llwyaid o besto neu basata, a bon appétite mae gennych bryd rhad a swmpus. 'Dyw e ddim cweit yn Jamie Oliver ond mae'n ddigon i leino'r stumog cyn bwrw'r dre.
Cypyrddau Mam a Dad
Cofiwch, os 'y chi adref am benwythnos, gwnewch yn siŵr o dwrio drwy gypyrddau Mam a Dad am yr hanfodion: saws coch, olew olewydd ac ambell botel win sy'n segur gyda nhw.
Fflip fflops
Os nad ydych yn ddigon ffodus i hawlio en suite, mae rhannu tŷ bach a chawod yn dipyn o brofiad. Heb wneud i chi gyfogi, ystyriwch yr holl bobl ddieithr sydd wedi troedio ar lawr eich cawod, felly ewch â fflip fflops a chadwch botel o bleach yn handi!
Gwaetha'r modd, o fewn rhai wythnosau mae'n siŵr y byddwch wedi diosg yr holl safonau hylendid ac wedi cyfarwyddo â'r plwg sydd wedi tagu dan yr holl wallt a'r gawod sy'n gorlifo.
Papur tŷ bach personol
Mae papur tŷ bach yn gallu bod fel aur. Gair i gall, mae'n bwysig rhannu ond cadwch ambell rolyn dan glo rhag ofn bod argyfwng!
Daw Jacob a Nest o'r gorllewin: Jacob o Lanelli yn astudio Cymraeg a Gwleidyddiaeth a Nest o Ledrod yng Ngheredigion yn astudio'r Gyfraith a Chymraeg
'Fairylights' a chlustogau
Ar yr olwg gyntaf, fydd eich ystafell wely newydd yn wag ac yn ddifywyd. Ond wedi trip chwim i IKEA mae modd trawsnewid eich cell fach oeraidd yn nyth fach glyd llawn fairylights, clustogau a phlanhigion bach dibwys.
Gwin a gitâr
Ar gyfer y nosweithiau mas annisgwyl, sy'n codi'n aml iawn, mae'n syniad cadw stôr o win dan y gwely sy'n arbed chi rhag gorfod rhedeg i'r siop ar y funud ola'.
Mae'n debygol y bydd gan un o'ch ffrindiau newydd ddawn gerddorol, felly hanfodol yw pacio allweddell, gitâr neu hyd yn oed y delyn.
Beth am brofi noson o brosecco gan gydganu i glasuron Huw Chiswell mewn noswaith o 'Chiz a Fizz'!
Mwynhewch
Yn y flwyddyn gyntaf, gwnewch yn siŵr o fwynhau'r i'r eithaf. Wrth gwrs mae'r gwaith academaidd yn bwysig ond mae'r cymdeithasu a'r cyfleoedd allgyrsiol cyn bwysiced â'r holl draethodau.
Gwnewch y pethau gwyllt a chofleidiwch bob cyfle achos wedi'r cyfan a ddown nhw fyth yn nôl.
Cofiwch gael digon o hwyl!
Hefyd o ddiddordeb:
