Clinig newydd yn lleihau amser aros am ddiagnosis canser 92%

Mae canolfan ar gyfer cael diagnosis canser yn sydyn wedi lleihau amseroedd aros hyd at 92% yn ei flwyddyn gyntaf, gan hefyd leihau costau.

Fel rhan o'r cynllun roedd cleifion aeth at eu meddyg teulu gyda symptomau allai fod yn arwydd o ganser yn cael eu gyrru i ganolfan diagnosis sydyn yn Ysbyty Castell-nedd Port Talbot.

Dywedodd Bwrdd Iechyd Bae Abertawe bod amseroedd aros wedi gostwng i lai na chwe diwrnod.

Mae adroddiad sy'n asesu llwyddiant y cynllun hefyd yn dweud y gallai'r clinig fod yn fwy cost effeithiol na'r ffyrdd traddodiadol o gael diagnosis.

189 o gleifion

Rhwng Mehefin 2017 a Mai 2018 fe wnaeth meddygon teulu gyfeirio 189 o gleifion i'r clinig, oedd yn gweithredu ar ddau ddiwrnod yr wythnos.

Os nad oedd angen asesiadau pellach, cafodd cleifion ddiagnosis mewn 5.9 diwrnod ar gyfartaledd.

Mae'r clinig yn cael ei gynnal yn Ysbyty Castell-nedd Port Talbot ar ddau ddiwrnod yr wythnos

Yn ystod yr astudiaeth cafodd 23 o bobl ddiagnosis o ganser, tra bod 30 arall wedi cael diagnosis o gyflyrau eraill fel briw ar y stumog, methiant yn y galon neu'r diciâu.

Ym mlwyddyn gyntaf yr astudiaeth doedd y clinig ddim yn gweld digon o gleifion i fod yn gost effeithiol, ond erbyn hyn mae'n perfformio'n well na gofal traddodiadol ac yn gweld pedwar neu bump claf pob diwrnod mae ar agor.

Dywedodd awduron yr adroddiad bod y ffigyrau yn awgrymu bod buddion i'r ganolfan, ond eu bod yn bwriadu parhau â'r astudiaeth er mwyn casglu mwy o ddata.