Cyhuddo ail ddyn o geisio llofruddio yng Nghaerdydd

Cafodd yr heddlu eu galw i Rodfa Harris yn ardal Tredelerch ddydd Llun diwethaf

Mae ail ddyn bellach wedi ei gyhuddo o geisio llofruddio yn dilyn ymosodiad difrifol ar ddyn 21 oed yng Nghaerdydd.

Fe gafodd Heddlu'r De eu galw i ardal Tredelerch brynhawn Llun, 13 Ebrill, yn dilyn adroddiadau o ymosodiad difrifol ar ddyn 21 oed.

Dywedon nhw fod y dyn wedi dioddef anafiadau yn dilyn yr hyn maen nhw'n ei gredu oedd ymosodiad gyda chyllell fawr a gwn.

Bydd Kamal Legall, 25 oed o ardal Tyllgoed, yn ymddangos yn Llys Ynadon Caerdydd ddydd Mawrth.

Mae dyn arall, Keiron Hassan, 32 o ardal Trelái, eisoes wedi ymddangos yn y llys ar yr un cyhuddiad.

Mae dau ddyn arall gafodd eu harestio mewn cysylltiad â'r digwyddiad wedi cael eu rhyddhau.