Cyffuriau, arfau ac arian wedi eu canfod yn y pandemig

Mae'r heddlu wedi bod yn atal cerbydau er mwyn gwirio bod y daith yn un hanfodolHeddlu Dyfed-Powys

Mae'r heddlu wedi bod yn atal cerbydau er mwyn gwirio bod y daith yn un hanfodol

Mae arian a gwerth miloedd o bunnoedd o gyffuriau wedi cael eu cipio gan yr heddlu o ganlyniad anuniongyrchol i atal cerbydau yn ystod y pandemig coronafeirws.

Fe ddywed uwch swyddogion yr heddlu ei bod wedi bod yn haws dal troseddwyr gan bod llai o gerbydau ar y ffyrdd.

Mae Heddlu Gwent wedi cipio dros 300 o gerbydau a swm sylweddol o gyffuriau Dosbarth A yn ystod ymgyrchoedd.

Mae'r lluoedd yng Nghymru wedi bod yn gweithredu "patrolau Covid" ar feiciau modur, ac wedi sefydlu mannau gwirio.

Dywedodd Dirprwy Brif Gwnstabl Gwent, Amanda Blakeman, eu bod nhw wedi canfod popeth o ganabis i gocên, a bod troseddwyr trefnedig nawr yn "llawer mwy amlwg".

Dywedodd Amanda Blakeman bod troseddwyr yn fwy amlwg gyda llai o gerbydau ar y ffyrdd

Daeth swyddogion o hyd i 2kg o gocên a £30,000 mewn un cerbyd gafodd ei atal.

Ychwanegodd Ms Blakeman: "Rydym wedi cipio miloedd o bunnoedd mewn arian parod, symiau mawr o gyffuriau Dosbarth A a mathau eraill o gyffuriau hefyd.

"Ry'n ni hefyd wedi cipio 347 o gerbydau ers i hyn ddechrau."

Mae Sarjant Stuart Poulton yn gweithio ar feic modur i'r heddlu a dywedodd: "Gan ein bod ni'n gwirio cymaint mwy nawr, ry'n ni'n gweld mwy a mwy o droseddau.

"Mae'n siwr eu bod nhw wastad wedi bod allan yna, ond nawr ry'n ni'n eu dal nhw yn llawer haws. Mae'n ganlyniad anuniongyrchol o'r lockdown."

Dywedodd Sarjant Stuart Poulton ei bod hi'n llawer haws dal troseddwyr oherwydd y lockdown

Draw yn ardal Heddlu Dyfed-Powys, mae swyddogion wedi canfod arfau troseddol a chyffuriau ac wedi atal un gyrrwr oedd heb drwydded nac yswiriant oedd yn tynnu jac-codi-baw oedd wedi'i ddwyn y tu ôl i'w gerbyd.

Yn Sir Benfro fe gafodd dyn oedd wedi gyrru o Gaerdydd i Ddinbych-y-pysgod i fynd am dro ei arestio pan ddaeth hi'n amlwg ei fod wedi cael ei alw nôl i'r carchar.

Ychwanegodd Heddlu Dyfed-Powys fod "swm sylweddol o gocên" wedi ei ganfod mewn car a gafodd ei atal yn Sanclêr ym mis Ebrill.

Dywedodd y Prif-Arolygydd Martin Smith ei bod wedi bod yn haws dal troseddwyr oedd yn symud i mewn ac allan o Gymru.

"Nid pob gyrrwr sy'n droseddwr, ond mae pob troseddwr yn gyrru," meddai.

"Maen nhw'n mynd i fod yn fwy amlwg gan fod llai o gerbydau ar y ffyrdd."

Straeon perthnasol