Jazz Langdon yw enillydd cystadleuaeth Dysgwr yr Ŵyl AmGen

Jazz Langdon o Sir Benfro yw enillydd Dysgwr yr Ŵyl AmGen, cystadleuaeth ar y cyd gan yr Eisteddfod Genedlaethol, BBC Radio Cymru a'r Ganolfan Dysgu Cymraeg Genedlaethol.

Aeth yr athrawes 27 oed, sy'n byw yn Arberth, ati i ddysgu'r Gymraeg dros ddwy flynedd yn ôl.

Erbyn hyn mae'n gydlynydd y Gymraeg yn ei swydd newydd fel athrawes yn Ysgol Tavernspite.

"Mae'r Gymraeg wedi agor llawer o ddrysau yn fy ngyrfa," meddai Jazz.

"Yn fy swydd dwi'n datblygu'r pwnc ac yn helpu athrawon eraill.

"Dwi'n ceisio defnyddio'r iaith drwy'r amser."

• Pump ar restr fer Dysgwr y Flwyddyn Gŵyl Amgen

Fe ddechreuodd ddysgu'r iaith ar gwrs sabothol Cymraeg Mewn Blwyddyn gyda Rhagoriaith.

Nod y gystadleuaeth yw dathlu llwyddiannau dysgwyr sy'n gwneud eu gorau glas i ddefnyddio'r iaith yn eu bywydau pob dydd.

• GWRANDO: Amserlen Gŵyl AmGen BBC Radio Cymru

• POBL: Pwy yw llywyddion y dydd Gŵyl AmGen?

• O'R ARCHIF: Sêr y Steddfod

• GWYBODAETH: Datgelu gwobrau cystadlaethau Gŵyl AmGen

• MWY: Yr Eisteddfod AmGen ar Cymru Fyw

Roedd pedwar arall ar y rhestr fer ar gyfer y wobr, sef Mathias Maurer, Siân Sexton, Elisabeth Haljas a Barry Lord.

Cafodd y pump eu cyfweld gan Shân Cothi ar BBC Radio Cymru fel rhan o'r gystadleuaeth.

Roedd y panel beirniadu yn cynnwys Betsan Moses, prif weithredwr yr Eisteddfod Genedlaethol, Aran Jones, cyd-sylfaenydd SaySomethingInWelsh a Dona Lewis, dirprwy brif weithredwr a chyfarwyddwr cynllunio a datblygu'r Ganolfan Dysgu Cymraeg Genedlaethol.

Dywedodd Dona Lewis: "Roedd yn gystadleuaeth agos, ond fe ddaeth Jazz i'r brig oherwydd ei bod wedi llwyddo i gynnal cyfweliad hollol naturiol, gydag iaith o safon uchel tu hwnt.

"Mae hefyd yn ysbrydoliaeth i bob dysgwr gan ei bod wedi llwyddo i feistroli'r iaith mewn cyfnod mor fyr. Llongyfarchiadau mawr iawn iddi."