Teithwyr o'r Almaen a Sweden i orfod hunan-ynysu

Mae'r Almaen wedi bod mewn cyfnod clo tebyg i Gymru ers dechrau'r wythnos

Mae Llywodraeth Cymru wedi cyhoeddi y bydd yn rhaid i deithwyr o'r Almaen a Sweden hunan-ynysu am bythefnos wedi iddyn nhw gyrraedd Cymru o'r penwythnos hwn.

Dywedodd y Gweinidog Iechyd, Vaughan Gething ei fod wedi gwneud y penderfyniad wedi iddo adolygu asesiadau diweddaraf y Gyd-ganolfan Bioddiogelwch.

"Rwyf wedi penderfynu y bydd Yr Almaen a Sweden yn cael eu tynnu oddi ar y rhestr o wledydd a thiriogaethau sydd wedi'u heithrio," meddai.

"Felly bydd rhaid i deithwyr o'r gwledydd hynny hunan-ynysu pan fyddant yn cyrraedd Cymru."

Mae nifer o wledydd Ewropeaidd, fel Ffrainc, Gwlad Belg, Sbaen a Phortiwgal eisoes wedi'u tynnu oddi ar y rhestr o wledydd sydd wedi'u heithrio.

Mae'r holl wybodaeth am a ydy gwledydd a thiriogaethau wedi'u heithrio ai peidio ar gael ar wefan Llywodraeth Cymru.

Bydd y rheolau newydd yn dod i rym am 04:00 fore Sadwrn, 7 Tachwedd.