Llys Apêl yn cytuno bod cais cynllunio o 1967 yn annilys

Mae ardal Balkan Hill yn edrych dros bentref Aberdyfi

Mae'r Llys Apêl wedi dyfarnu nad yw caniatâd cynllunio 53 oed ym Mharc Cenedlaethol Eryri bellach yn ddilys.

Mae'r penderfyniad yn golygu bod caniatâd cynllunio a roddwyd ar gyfer datblygiad o dros 400 o dai yn Aberdyfi wedi ei ddirymu.

Roedd cwmni datblygu Hillside Parks Limited wedi defnyddio cais cynllunio gafodd ei roi dros 50 mlynedd yn ôl fel rheswm dilys i adeiladu 401 o dai yn Aberdyfi.

Cyngor Sir Meirionydd oedd wedi rhoi'r caniatâd yn 1967 ar gyfer stad o dai yn ardal Balkan Hill, ond yn y 70au fe beidiodd yr awdurdod â bod.

• Atal adeiladu wedi penderfyniad 'unigryw'

Ers i'r cynlluniau gael eu cymeradwyo dros 50 o flynyddoedd yn ôl, dim ond 27 o dai sydd wedi cael eu hadeiladu ar y safle yn dilyn amryw ganiatâd cynllunio dilynol.

Mae'r datblygiadau dilynol hyn, sydd wedi bod yn digwydd dros gyfnod o nifer o flynyddoedd, wedi gwyro i'r fath raddau o'r cydsyniad gwreiddiol fel bod Awdurdod Y Parc Cenedlaethol yn ei ystyried yn annilys.

Fe wnaeth y datblygwr gymryd camau cyfreithiol yn erbyn Awdurdod Y Parc Cenedlaethol, a daeth yr achos i'r llysoedd ym Medi 2019.

Cafwyd penderfyniad o blaid Awdurdod y Parc Cenedlaethol ym mis Hydref 2019 ac fe gafodd y caniatâd cynllunio gwreiddiol ei ddiddymu.

Mae'r penderfyniad nawr wedi ei gadarnhau gan y Llys Apêl.

'Ansicrwydd sylweddol'

Dywedodd Jonathan Cawley, cyfarwyddwr cynllunio a rheolaeth tir Awdurdod y Parc Cenedlaethol, eu bod yn "croesawu'r penderfyniad gan y Llys Apêl".

"Roedd ansicrwydd sylweddol ynglŷn â'r safle a sut y byddai'n datblygu," meddai.

"Nid yw yr un o'r 27 o dai sydd wedi eu hadeiladu ar y safle yn cydymffurfio a'r cynllun gwreiddiol, ac roedd hyn yn codi nifer o gwestiynau difrifol o ran beth fyddai'n cael ei ddatblygu ar y safle yn y dyfodol.

"Bydd hyn yn mynd i'r afael â'r dryswch a'r ansicrwydd o gylch y cynllun hanesyddol hwn.

"O ganlyniad bydd rhaid i unrhyw ddatblygiad yn yr ardal yn y dyfodol gydymffurfio a'r Cynllun Datblygu Lleol."