Negeseuon Nadolig gobeithiol, er heriau blwyddyn anodd

Y Parchedicaf John Davies, Archesgob Cymru

Ag hithau'n ddiwrnod Nadolig gwahanol iawn i'r arfer, ac ar ddiwedd blwyddyn heriol, mae arweinwyr crefyddol wedi rhannu negeseuon gobeithiol ar gyfer yr ŵyl.

Dylai pawb geisio cyd-dynnu, bod yn amyneddgar a chadarnhaol a chwilio am y goleuni ym mhen draw'r twnnel, meddai Archesgob Cymru, y Parchedicaf John Davies.

"Yng Nghymru, rydym newydd glywed y byddwn yn mynd yn ôl i gyfnod clo arall a bydd hynny wedi dychryn llawer ohonom ac, efallai, gwneud i ni feddwl nad yw'r goleuni ym mhen draw'r twnnel, yr oeddem ni'n meddwl ei fod yno, yno o gwbl ac yn sicr nad yw'n disgleirio mor llachar ag y gallai," meddai.

"Felly rhaid i ni i gyd dynnu at ein gilydd ac edrych, nid i'r tywyllwch, ond tuag at y goleuni, a chydnabod bod camau cadarnhaol yn cael eu cymryd."

• Uno pobl ar noswyl Nadolig drwy ganu Dawel Nos

• 'Parchu ein gilydd': Sut beth yw'r Nadolig i grefyddau eraill?

• Unigolion a phartïon plygain i ganu'n rhithiol eleni

Ychwanegodd: "Trwy ddyfeisgarwch dynol, cydymdeimlad dynol a'r gorau un mewn natur ddynol, mae cynnydd yn digwydd. Ac, er bod y ffordd yn mynd i fyny ac i lawr ac yn glonciog mewn ambell i fan, fe fyddwn yn dod trwy hyn.

"Gadewch i ni wneud ein gorau i fod yn gadarnhaol, yn amyneddgar ac, hyd yn oed os ydym yn wynebu anawsterau nad oeddem erioed wedi dychmygu y byddem, i arfer cred wirioneddol a dofn bod goleuni ym mhen draw'r twnnel y byddwn ni yn ei gyrraedd yn y diwedd."

Bydd yr Archesgob yn pregethu yng Nghadeirlan Aberhonddu ddydd Nadolig am 11:00 mewn gwasanaeth fydd yn cael ei ffrydio'n fyw ar dudalen Facebook y Gadeirlan.

Bendith cysylltiadau ar-lein

Wrth i bobl wynebu Nadolig dan gwmwl Covid, mae'r feirws yn ddi-rym i atal miliynau o bobl rhag cwrdd â ffrindiau a theulu trwy gyfrwng y rhyngrwyd, meddai Ysgrifennydd Cyffredinol Undeb yr Annibynwyr Cymraeg yn ei neges Nadolig yntau.

Y Parch Dyfrig Rees, Ysgrifennydd Cyffredinol Undeb yr Annibynwyr Cymraeg

"Wrth i ni ddathlu genedigaeth Iesu Grist, y cyfathrebwr mawr rhwng Duw a dyn, mae'n fendith bod y dull hwn o gyfathrebu yn galluogi llawer i gyfarfod wyneb yn wyneb, er ar wahân," meddai'r Parchedig Dyfrig Rees.

"Mae'n gyfrwng sydd eisoes wedi gwasanaethu ein heglwysi'n dda yn ystod y pandemig ofnadwy hwn a gall helpu i leddfu digalondid llawer o bobl na allant gwrdd â'u teuluoedd yn bersonol y Nadolig hwn."

'Gwydnwch pobl wedi disgleirio'

Dywedodd Archesgob Pabyddol Caerdydd, George Stack fod 2020 wedi dod â mwy na'i chyfran o argyfyngau rhwng y pandemig, trafferthion economaidd, llifogydd a dryswch ynghylch Brexit.

Ond dywedodd bod argyfyngau'n gallu esgor ar "gyfle, her a ffordd newydd o edrych ar bethau a dod o hyd i atebion creadigol".

Roedd ysbryd yr ŵyl yn fyw ym mhentref Ffrith, Sir y Fflint, nos Iau wrth i bobl ganu carolau tu allan i'w cartrefi

Dywedodd bod "yng nghanol yr holl helbul, mae cryfder, tosturi, dewrder a gwydnwch nifer di-ri o bobl wedi disgleirio".

"Rwy'n meddwl yn syth am staff y gwasanaeth iechyd," meddai. "Y proffesiynau gofal a brys.

"Athrawon sydd wedi parhau i addysgu ein plant, ar adegau dan yr amgylchiadau anoddaf.

"Y fyddin o wirfoddolwyr ar draws Cymru sydd wedi ymweld, siopa, bod yn gyfaill, dosbarthu pecynnau bwyd, gweithio mewn banciau bwyd a choginio prydau di-ri i'r rhai mewn angen."

Mae nifer o eglwysi Methodistaidd yn cynnal gwasanaethau Nadolig drwy gyfrwng Facebook.

Roedd neges ar wefan Undeb Bedyddwyr Cymru yn atgoffa pobl o neges yr ŵyl: "Wrth i ni wynebu Nadolig gwahanol eleni oherwydd y pandemig byd-eang, cawn ein hatgoffa mai canolbwynt popeth a ddathlwn yw rhyfeddod Iesu, Duw gyda ni, a anwyd ym Methlehem i fod yn Waredwr y Byd."

Dywedodd Esgob Bangor, y Gwir Barchedig Andrew John: "Flwyddyn yn ôl, ychydig ohonom fyddai wedi dychmygu y byddwn yn dathlu'r Nadolig gyda chysgod feirws dros lawer iawn o'r byd.

"Llai fyth oedd yn gwybod beth yw Zoom, heblaw rywbeth ynghylch cyflymder a brys.

"Mae cymaint wedi newid yn ystod y 12 mis diwethaf nes bod darogan beth allai fod o'n blaenau fod mor ansicr a chyrhaeddiad y pandemig, sydd wedi cymryd cymaint o fywydau ac wedi gadael cymunedau'n teimlo'n ynysig ac yn drwblus. Mae'r gost i'r economi wedi bod yn enfawr a lles y wlad wedi dioddef, o bosibl, hyd yn oed yn fwy.

"Byddai hynny'n swnio'n llwm, y tu hwnt i waredigaeth oni bai bod brechiad ar fin cyrraedd ac yn addo dyfodol gwell.

"Nid yw'n eglur beth fydd o'n blaenau yn y normal newydd ond mae hwn yn gyfnod y bydd llyfrau'n cael eu hysgrifennu amdano."