Tywydd rhewllyd: Gohirio gemau Abertawe, Casnewydd a Wrecsam

Roedd eira i'w weld yn stadiwm Sheffield Wednesday cyn eu gêm yn erbyn Wycombe nos Fawrth

Mae gemau Abertawe, Casnewydd a Wrecsam y penwythnos hwn wedi cael eu gohirio o ganlyniad i'r tywydd rhewllyd.

Roedd Abertawe a Chasnewydd i fod yn chwarae oddi cartref yn Lloegr ddydd Sadwrn - Yr Elyrch yn Sheffield Wednesday, a'r Alltudion yn erbyn Port Vale yn Stoke.

Mae'r ddwy gêm wedi'u canslo oherwydd bod y caeau wedi rhewi, a gyda rhagor o rybuddion am eira a rhew mewn grym i ogledd Lloegr ddydd Sadwrn mae'r meysydd yn annhebygol o ddadmer mewn pryd.

Notts County oedd i fod yn ymweld â'r Cae Ras, ond dywedodd Wrecsam bod y cae wedi rhewi yn dilyn tymereddau o hyd at -7 yn ystod yr wythnos.

Roedd degau o gemau yn y Bencampwriaeth, Adran Un ac Adran Dau wedi'u gohirio erbyn prynhawn Gwener, ac mae disgwyl y bydd rhagor yn cael eu gohirio cyn prynhawn Sadwrn.