Mourinho yn cwestiynu neges cyfryngau cymdeithasol Bale

Dywed rheolwr tîm pêl-droed Tottenham, Jose Mourinho, bod neges ar gyfrif cyfryngau cymdeithasol Gareth Bale yn "gwrth-ddweud realiti".

Collodd y blaenwr i Gymru, sydd ar fenthyg o Real Madrid, gêm Tottenham ddydd Mercher yn erbyn Everton.

Dywedodd Mourinho fod y chwaraewr wedi gofyn am sgan ar ôl y sesiwn ymarfer ddydd Llun a hynny cyn i Bale ddweud ar ei gyfrif cyfryngau cymdeithasol ddydd Mawrth: "Sesiwn wych heddiw."

"Roedd y neges yn gwrth-ddweud realiti," meddai Mourinho.

• Beth sydd 'di digwydd i yrfa Gareth Bale?

• Gareth Bale yn arwyddo i Tottenham Hotspur

• Bale: 'Real Madrid yn ei gwneud yn anodd gadael'

Nid yw Bale, 31, wedi llwyddo i gael llawer o ddylanwad ers dychwelyd i'r Spurs ym mis Medi.

Dim ond mewn dwy gêm Uwch Gynghrair mae e wedi dechrau ac nid yw wedi chwarae i'r tîm ers 31 Ionawr.

"Ers dechrau'r tymor wrth feddwl am bopeth, roeddwn ni'n ceisio bod yn breifat iawn... ond teimlais bod angen i fi ymateb i'r sefyllfa," meddai Mourinho ddydd Gwener.

"Efallai mai rhywun arall oedd yn gyfrifol am y neges, 'dwi ddim yn gwybod. Ond roedd y post yn dweud 'sesiwn hyfforddiant wych - rydw i'n barod' ac roedd hynny'n hollol anghywir.

"Fe gafodd Bale sgan, ond ni ddangosodd y sgan yr un anaf ond roedd ei deimladau dal yna ac fel hyfforddwyr, pobl chwaraeon gwyddonol a phobl feddygol, allwn ni fyth mynd yn groes i deimladau achos mae teimladau'r chwaraewr lot yn fwy pwysig na ni i gyd.

"Doedd e ddim yn barod ar gyfer y gêm. Mae mor syml â hynny."

Mae Tottenham yn wynebu Manchester City ddydd Sadwrn.

"Os fydd e'n barod fory, mae wedi ei ddewis ar gyfer fory," meddai Mourinho.