Statws sefydlog: 'Rydym eisiau ichi aros yng Nghymru'

Mae'r Prif Weinidog Cymru wedi ysgrifennu llythyr agored at ddinasyddion yr Undeb Ewropeaidd sy'n byw yma yn eu hannog i gyflwyno cais am statws preswylydd sefydlog cyn 30 Mehefin os nad ydyn nhw eisoes wedi gwneud.

Yn y llythyr, sydd mewn 11 o ieithoedd, dywedodd Mark Drakeford: "Rydym eisiau ichi aros yng Nghymru. Bydd croeso i chi yma bob amser."

Mae angen ymgeisio am y statws drwy gynllun y Swyddfa Gartref er mwyn eu galluogi i fod â'r un hawliau â dinasyddion Prydain ar ôl mis Mehefin eleni.

Mae ffigyrau diweddaraf y Swyddfa Gartref yn awgrymu bod y mwyafrif o'r bobl sydd angen gwneud cais wedi gwneud hynny erbyn hyn.

Ond mae pryder o hyd bod rhai grwpiau ddim yn ymwybodol bod angen iddyn nhw ymgeisio, neu eu bod â phryderon ynghylch y broses.

Gall y grwpiau dan sylw gynnwys pobl sy'n agored i niwed, yr henoed a phobl sydd wedi byw yma ers blynyddoedd maith.

Mae Mark Drakeford yn pwysleisio bod y dyddiad cau i ymgeiswyr "yn prysur agosáu"

"Efallai eich bod chi wedi dod i fyw i'r DU sawl blwyddyn yn ôl a heb sylweddoli bod angen ichi wneud cais," meddai Mr Drakeford yn y llythyr.

"Efallai eich bod chi wedi cael plant ers ichi fod yn byw yma, ac nad oeddech chi'n sylweddoli bod angen i chi wneud cais ar eich cyfer chi eich hun a'ch plant.

"Efallai nad yw'n hawdd i chi gael mynediad at ffôn clyfar neu gyfrifiadur. Neu efallai eich bod yn teimlo wedi'ch llethu gan y broses neu'n bryderus nad oes gennych y gwaith papur cywir."

Beth bynnag y sefyllfa, dywed Mr Drakeford bod cymorth arbenigol ar gael am ddim i helpu pobl gyda'r broses ymgeisio.

Mae Llywodraeth Cymru'n gweithio gyda rhwydwaith o arbenigwyr cyfreithiol, Cyngor ar Bopeth ac elusennau ac mae gwybodaeth hefyd ar wefan Paratoi Cymru.

• Brexit: 6,000 dal heb wneud cais i aros yn y DU

• Y DU wedi gadael yr Undeb Ewropeaidd yn swyddogol

Dywedodd Mr Drakeford ei fod wedi ysgrifennu'r llythyr "i ddweud wrthych chi a'ch teuluoedd y bydd croeso ichi bob amser yma yng Nghymru".

"Mae eich cyfraniad i'n cymunedau, ein gwasanaethau cyhoeddus a'n busnesau yn amhrisiadwy," meddai.

Dywed bod y blynyddoedd diwethaf wedi bod yn anodd i ddinasyddion yr undeb yng Nghymru oherwydd ansicrwydd Brexit ac yna'r pandemig "sydd wedi gwneud ymdopi gyda sefyllfa anodd yn anoddach fyth".

Ychwanegodd: "Hoffwn ichi wybod ein bod ni eisiau ichi aros yma, a pharhau i fwynhau'r rhyddid a'r hawliau y gall Cymru, fel gwlad groesawgar, eu cynnig i chi."