Lle i enaid gael llonydd: Hanna Hopwood Griffiths
- Cyhoeddwyd
Mae Hanna Hopwood Griffiths yn cyflwyno'r rhaglen Gwneud Bywyd yn Haws ar BBC Radio Cymru ac yn byw yng Nghaerfyrddin gyda'i gŵr Iwan Griffiths, gohebydd Newyddion S4C, a'u meibion Aneirin a Brynmor.
Yn ystod y cyfnod clo mae'r ardd gefn wedi bod yn ddihangfa iddi a'i theulu meddai, wrth drafod ei lle i gael llonydd:
Mae'n anodd credu ein bod yn agosáu at flwyddyn gyfan ers cyhoeddi'r Clo Mawr cyntaf. Yn ystod y cyfnod hwn, mae llawer ohonom wedi dod i adnabod ein milltir sgwâr o'r newydd, darganfod cuddfannau a, gobeithio, sawl lle lleol i'r enaid gael llonyddwch yng nghanol cyfnod go gythryblus.
A ninnau'n byw yn Nyffryn Tywi, does dim rhaid crwydro'n bell i ddod o hyd i lefydd sy'n caniatáu'r tawelwch hwnnw, ac mae sawl wâc hyfryd ar stepen ein drws ni.
Yn ystod y cyfnod hwn, rydym wedi manteisio ar y llwybrau hyn fel teulu ac wedi cael y pleser o weld ein mab blwydd oed, Brynmor, yn mynd o orwedd yn y carrycot i gerdded ling-di-long law yn llaw gyda'i frawd mawr, Aneirin.
Ond er hyfrydwch y llwybrau hyn wrth lannau Afon Tywi, y lle sydd wedi dod â llonyddwch i'm henaid yn fwy nag unman arall yn y cyfnod hwn yw'r lle wrth gefn ein cartref: ein gardd.
Gyda'r coed yn dechrau gwisgo'u dail unwaith eto, alla i ddim peidio â help ond teimlo bod rhythm y tymhorau'n gryfach eleni nag erioed, a hynny mae'n siŵr, oherwydd fy mod wedi talu mwy o sylw i'r hyn sydd o'm cwmpas.
Bu'r ardd yn ddihangfa yn ystod diwrnodau hir ddechrau'r cyfnod clo cyntaf. Treuliais oriau yn chwarae pi-po, splashio yn y pwll padlo, paentio (wel, trio!) a chasglu dail gydag Aneirin a Brynmor tra bo Iwan yn y gwaith.
O'r ardd, casglodd y bois flodau ar gyfer Sul y Mamau 2020 yn ogystal â thusw hyfryd ar achlysur pen-blwydd ein priodas. Yma, yng ngoleuni'r gwyll, cynnodd Iwan dân fin nos, gyda'r plant - o bellter - yn rhyfeddu ar liwiau'r fflamau.
Tyfon ni lysiau, adeiladu maes chwarae, a gweld llygaid y bechgyn yn sgleinio wrth weld iâr fach yr haf a buwch goch gota am y tro cyntaf erioed.
Mae'r dyddiau lle bu'r oriau'n teimlo'n hir wedi mynd yn angof rywsut, a'r dyddiau melys yn aros yn y cof.
Ond y prif reswm dros ddewis yr ardd fel y lle sy'n rhoi llonydd i'r enaid? Wel, am mai fan hyn oedd cartref sawl aduniad hir-ddisgwyliedig yn ystod tymhorau'r haf, wrth i'r haul ganiatáu i ni greu atgofion bythgofiadwy yng nghwmni swigod teuluol.
Anghofia' i fyth rai o'r eiliadau rheiny, yr eiliadau a dawelodd fy enaid.
Gyda'r gwanwyn yn egino'n obeithiol, gwn nad yw'r eiliadau rheiny yn rhy bell o'u profi eto.
Hefyd o ddiddordeb: