Faint mae biliau Treth Cyngor yn cynyddu yng Nghymru?

Mae'r cynnydd o 6.95% yn Wrecsam dros saith gwaith yn uwch na'r gyfradd chwyddiant

Bydd biliau Treth Cyngor yn cynyddu o leiaf dwywaith cymaint â chyfradd chwyddiant ym mhob rhan o Gymru eleni.

Mae'r lefelau'n cynyddu o 2.65% yn Rhondda Cynon Taf i 6.95% yn Wrecsam, ond mae Wrecsam yn dal i godi llai na'r mwyafrif o awdurdodau yng Nghymru.

Yn Sir Benfro mae'r lefel isaf o Dreth Cyngor - £1,190 ar gyfer adeilad Band D.

Tra mai Rhondda Cynon Taf sy'n gweld y cynnydd lleiaf, mae'r cyngor ymysg y rheiny sy'n codi'r tâl mwyaf.

Cyfradd chwyddiant yn 0.9%

Mae Llywodraeth Cymru wedi cynyddu'r arian sydd ar gael i gynghorau yn uwch na chyfradd chwyddiant am yr ail flwyddyn yn olynol.

Dywedodd bod cronfeydd caledi yn sicrhau na fyddai costau'r pandemig yn rhoi "pwysau ychwanegol" ar dalwyr Treth Cyngor.

0.9% oedd cyfradd chwyddiant yn y flwyddyn hyd at Ionawr 2021 yn ôl ffigyrau diweddaraf y Swyddfa Ystadegau Gwladol.

Sir Benfro sy'n codi'r lleiaf o dâl am Dreth Cyngor - £1,190 ar gyfer adeilad Band D

Mae arian craidd gan Lywodraeth Cymru yn talu am tua dau draean o wariant pob cyngor.

Daw'r gweddill o Dreth Cyngor, ac unrhyw wasanaeth arall y mae cynghorau'n codi tâl amdano.

Dywedodd Llywodraeth Cymru y byddan nhw'n rhoi £4.65bn i gynghorau Cymru yn 2021-22 - cynnydd 3.8% o'i gymharu â'r llynedd.

Roedd y swm hynny hefyd wedi cynyddu 4.3% y llynedd.

Cynnydd mewn Treth Cyngor a'r gost ar gyfer adeilad Band D ar gyfer 2021-22

Abertawe - 2.99% - £1,448

Blaenau Gwent - 3.3% - £1,768

Bro Morgannwg - 3.9% - £1,357

Caerdydd - 3.5% - £1,310

Caerffili - 3.9% - £1,231

Casnewydd - 3.7% - £1,242

Castell-nedd Port Talbot - 2.75% - £1,660

Ceredigion - 3.5% - £1,413

Conwy - 2.95% - £1,383

Gwynedd - 3.7% - £1,483

Merthyr Tudful - 3.55% - £1,729

Pen-y-bont ar Ogwr - 3.9% - £1,597

Powys - 2.9% - £1,404

Rhondda Cynon Taf - 2.65% - £1,538

Sir Benfro - 3.75% - £1,190

Sir Ddinbych - 3.8% - £1,437

Sir y Fflint - 3.95% - £1,394

Sir Fynwy - 3.89% - £1,434

Sir Gaerfyrddin - 3.45% - £1,362

Torfaen - 3.95% - £1,421

Wrecsam - 6.95% - £1,317

Ynys Môn - 2.75% - £1,341