Adnabod corff trydydd pysgotwr cwch y Nicola Faith

Diflannodd Alan Minard, Ross Ballantine a Carl McGrath wrth bysgota ym mis Ionawr

Mae Heddlu Gogledd Cymru wedi cadarnhau mai corff Alan Minard, un o dri physgotwr a aeth ar goll oddi ar arfordir y gogledd ym mis Ionawr, a gafodd ei ddarganfod yng Nghilgwri dros bythefnos yn ôl.

Diflannodd Alan Minard, oedd yn 20 oed, a'r ddau bysgotwr arall wedi i'w cwch, y Nicola Faith, fethu â dychwelyd i harbwr Conwy ar 27 Ionawr.

Roedd yr awdurdodau eisoes wedi adnabod cyrff Carl McGrath a Ross Ballantine wedi i'r tri gael eu darganfod oddi ar yr arfordir rhwng Cilgwri a Blackpool ganol Mawrth.

Cafwyd hyd i rafft achub y Nicola Faith ddechrau Mawrth oddi ar arfordir Yr Alban

Dywedodd yr heddlu: "Mae'r teulu wedi cael gwybod ac maen nhw'n cael cefnogaeth swyddogion arbenigol.

"Hoffai'r teulu ddiolch i'r gymuned leol a busnesau am eu cefnogaeth aruthrol a rhoddion, gan ofyn i bobl barchu eu preifatrwydd...

"Mae meddyliau pawb o fewn Heddlu Gogledd Cymru'n parhau gyda theuluoedd a ffrindiau'r tri physgotwr."

'Atebion i'r teuluoedd'

Parhau mae'r chwilio am gwch y Nicola Faith oddi ar arfordir y gogledd.

Wrth i'r ymdrech ailgychwyn ddydd Mawrth, ymunodd llong batrôl yr FPV Rhodri Morgan â'r chwilio o harbwr Conwy ynghyd â chwch sy'n eiddo i Gyfoeth Naturiol Cymru.

Yr FPV Rhodri Morgan yn gadael harbwr Conwy fore Mawrth wrth i'r chwilio ailgychwyn am y Nicola Faith

Mae gan y llong ddyfais sonar all helpu ymchwilwyr y Gangen Ymchwilio i Ddamweiniau Morol (MAIB).

Dywedodd llefarydd: "Mae MAIB yn parhau i ganolbwyntio ar gael atebion i'r teuluoedd a dysgu beth aeth o'i le fel bod modd cymryd camau i atal yr un peth rhag digwydd eto." 

Mae archwiliad preifat, sy'n cael ei ariannu wedi apêl ar y cyfryngau cymdeithasol gan deuluoedd y pysgotwyr, wedi dod cael ei atal dros dro nes bo'r tywydd wedi gwella digon.