'Rwyf eisiau i bobl deimlo bod eu pleidlais wedi cyfri'

Mae arweinydd Reform UK yng Nghymru, Nathan Gill, o blaid system cynrychiolaeth gyfrannol

Mae plaid Reform UK yn galw am newid i'r ffordd y mae aelodau Senedd Cymru'n cael eu hethol fel bod pobl yn teimlo "y bydd eu pleidlais yn cael ei gyfri".

Dywed arweinydd Cymreig y blaid, Nathan Gill, ei fod eisiau system fwy cyfrannol ac mae'n gobeithio taw dyma fydd etholiad olaf y Senedd i ddefnyddio'r drefn 'cyntaf heibio'r postyn'.

Mae hefyd o blaid prif weinidog wedi ei ethol yn uniongyrchol.

Mr Gill wnaeth arwain ymgyrch plaid UKIP a lwyddodd i gipio saith sedd ym Mae Caerdydd yn 2016.

Wedi anghytuno o fewn y blaid honno, fe adawodd y grŵp ym mis Awst 2016 i fod yn aelod annibynnol.

Yn Rhagfyr 2017, cafodd Mr Gill ei gyhuddo gan wleidydd Plaid Cymru o fradychu pleidleiswyr trwy fethu â mynychu sesiynau yn y Cynulliad, fel ag yr oedd y Senedd ar y pryd.

Ag yntau hefyd yn aelod o Senedd Ewrop ar y pryd, fe ymddiswyddodd Mr Gill fel AC yn ddiweddarach yn yr un mis.

Reform UK yw enw newydd Plaid Brexit a Nathan Gill sy'n ei harwain yng Nghymru

Gofynnwyd iddo ar raglen Politics Wales BBC Cymru pam ddylai pobl fwrw pleidlais drosto ar sail ei brofiadau blaenorol ym Mae Caerdydd.

Atebodd: "Gan fod fy rôl a'r holl reswm dros gael fy ethol yn y lle cyntaf yn ymwneud â Brexit, ynghylch cael Prydain allan o'r UE."

Reform UK yw enw newydd Plaid Brexit, a gafodd ei sefydlu gan gyn arweinydd UKIP, Nigel Farage, i ymgyrchu yn etholiadau Senedd Ewrop yn 2019.

• POLISÏAU: Cymharwch addewidion y pleidiau

• CANLLAW: Canllaw syml i Etholiad Senedd Cymru 2021

• DWY GROES MEWN DAU FLWCH: Pam bod gennych chi ddwy bleidlais?

• PWY SY'N SEFYLL YN FY ARDAL I?: Rhowch eich cod post yn y blwch

• PODLEDIAD: Croes yn y bocs

Pan ofynnwyd a yw'r blaid yn cael trafferth bod â rheswm i fodoli wedi Brexit, atebodd Mr Gill: "Mae gyda ni bwrpas yn bendant... dyna enw'r blaid, Reform UK.

"Rydym eisiau diwygio cryn dipyn o'r pethau ynghylch y ffordd rydym yn cael ein llywodraethu, pethau ynghylch y ffordd y mae'r wlad yn gweithredu a rhai o'r materion mawr, fel y BBC hyd yn oed a'r ffordd rydym yn talu ffi am drwydded.

"Nid yw dod o hyd i bwrpas yn broblem" ychwanegodd.

Mae Reform UK wedi gwneud addewid i bleidleiswyr na fyddai'r blaid yn gweithredu rhagor o gyfnodau clo oherwydd y pandemig.

O fewn "contract" y blaid gydag etholwyr, dywedodd y byddai hefyd yn mynd i'r afael â'r holl driniaethau sydd wedi pentyrru o fewn y GIG ac yn dileu trethi busnes.

Mae Politics Wales ar gael ar iPlayer.