Byddai'r Gwyrddion yn cefnogi 'cynnydd teg' ar dreth incwm

Cafodd rhai pwerau dros dreth eu datganoli i Gymru yn 2019

Byddai'r Blaid Werdd yn cefnogi "cynnydd teg" mewn treth incwm er mwyn darparu rhagor o arian ar gyfer gwasanaethau cyhoeddus, yn ôl ei harweinydd yng Nghymru.

Dywedodd Anthony Slaughter bod ei blaid yn credu mai'r "bobl sydd yn gwneud y mwyaf ddylai dalu'r mwyaf".

Ychwanegodd nad ydy'r Gwyrddion eisiau i gyllideb Llywodraeth Cymru roi blaenoriaeth i "gynlluniau enfawr i adeiladu ffyrdd".

Mae maniffesto'r blaid ar gyfer etholiad y Senedd yn addo y bydd gan y gwasanaeth iechyd a chynghorau "y cyllid sydd ei angen i gynyddu eu capasiti".

'Penderfyniadau anodd i'w gwneud'

Pan ofynnwyd iddo sut fyddai'r blaid yn talu am y gwariant ychwanegol ar y GIG, dywedodd Mr Slaughter: "Yr hyn rydyn ni wedi'i weld yn ystod y pandemig ydy, pan fo angen arian, mae modd ei ffeindio.

"Mae'n her, ac fe fydd 'na benderfyniadau anodd i'w gwneud ond mae'r arian yna os oes ei angen."

Ychwanegodd y bydd angen lleihau'r cyllid mewn rhai mannau er mwyn cynyddu gwariant fan arall, ac ar hyn o bryd fod arian yn cael ei wario ar "bethau sy'n gwaethygu'r argyfwng hinsawdd".

Dywedodd Anthony Slaughter (dde) fod "angen bod yn uchelgeisiol" ar newid hinsawdd

Pan ofynnwyd iddo a fyddai'r blaid yn cefnogi cynnydd mewn treth incwm i gynyddu gwariant ar wasanaethau cyhoeddus, dywedodd Mr Slaughter y byddai'n "cefnogi cynnydd teg mewn trethi".

"Rydyn ni'n credu mai'r bobl sydd yn gwneud y mwyaf ddylai dalu'r mwyaf," meddai.

Yn ôl ymchwil diweddaraf y llywodraeth, fe fyddai cynyddu treth incwm 1c ar gyfer y rheiny sydd yn y band uchaf yng Nghymru - pobl sy'n ennill dros £150,000 y flwyddyn - yn codi £3m.

Fe fyddai'r un cynnydd i'r band canol - pobl sy'n ennill rhwng £50,271 a £150,000 - yn codi £23m y flwyddyn, tra byddai cynnydd i'r band isaf - rhwng £12,571 a £50,270 - yn rhoi £177m ychwanegol i'r llywodraeth.

'Targed uchelgeisiol' ar allyriadau

Mae maniffesto'r Blaid Werdd hefyd yn cynnwys addewid i gyrraedd targed allyriadau carbon net sero erbyn 2030.

Ar hyn o bryd mae Llywodraeth Cymru yn bwriadu cyflwyno targed o gyrraedd hynny erbyn 2050, ond dywedodd Mr Slaughter y byddai hynny'n "rhy hwyr".

• POLISÏAU: Cymharwch addewidion y pleidiau

• DWY GROES MEWN DAU FLWCH: Pam bod gennych chi ddwy bleidlais?

• PWY SY'N SEFYLL YN FY ARDAL I?: Rhowch eich cod post yn y blwch

• WEDI DRYSU?: Dysgwch fwy gyda BBC Bitesize

• PODLEDIAD: Croes yn y bocs

• BLOG VAUGHAN RODERICK: Gwalia Deserta

Dywedodd dadansoddiad Cyfeillion y Ddaear o faniffesto'r Gwyrddion bod y targed o fod yn net sero erbyn 2030 yn "uchelgeisiol iawn" ond nad ydy'r polisïau ynddo yn cyd-fynd â'r targed hwnnw.

Ond dywedodd Mr Slaughter: "Fe fyddwn i yn dadlau y byddai ein polisïau yn cyrraedd y targedau hynny.

"Mae'n darged uchelgeisiol ond mae angen bod yn uchelgeisiol."

Fe allwch chi wylio'r cyfweliad yn ei gyfanrwydd ar BBC Politics Wales ar BBC One Wales am 10:15 fore Sul, ac yna ar iPlayer.