Teyrnged teulu wedi marwolaeth beiciwr modur

Roedd Scott Edwards yn fab "eithriadol" ac yn dad rhagorol i'w ferch, meddai ei deulu

Mae teulu beiciwr modur fu farw wedi gwrthdrawiad yng Ngwynedd wedi rhoi teyrnged iddo.

Bu farw Scott Adam Edwards, oedd yn 30 oed ac o ardal Wrecsam, wedi'r digwyddiad ar yr A494 rhwng Llanuwchllyn a Rhydymain, ger Dolgellau brynhawn Llun.

Dywedodd datganiad ar ran y teulu ei fod "yn fab eithriadol i'w fam, Wendy Tinsley a'i dad, Phil Edwards" ac yn frawd ac ewythr "annwyl".

Ychwanegodd y datganiad: "Roedd Scott yn dad rhagorol i'w ferch, Amaya, ac roedd yn meddwl y byd ohoni".

Dywedodd ei gymar, Faye: "Newidiodd fy mywyd er gwell y diwrnod wnes i gwrdd â thi. Byddaf yn dy garu am byth."

Fe ddigwyddodd y gwrthdrawiad rhwng car a beic modur ar yr A494 rhwng Llanuwchllyn a Rhydymain

Mae Heddlu Gogledd Cymru'n parhau i apelio am wybodaeth a lluniau dash cam gan unrhyw un oedd yn teithio ar hyd yr A494 tua 15:15 ddydd Llun, 31 Mai.

"Hoffwn gydymdeimlo'n ddiffuant gyda theulu a ffrindiau Scott ar yr adeg anodd yma," meddai'r Sarjant Emlyn Hughes o'r Uned Plismona'r Ffyrdd.

"Rydym yn parhau i erfyn ar unrhyw un all fod â gwybodaeth all helpu'r ymchwiliad i gysylltu â ni yn syth."