Ateb y Galw: Y gantores Ffion Emyr
- Cyhoeddwyd
Y gantores a'r cyflwynydd Ffion Emyr sy'n Ateb y Galw yr wythnos yma ar ôl iddi gael ei henwebu gan Leah Gaffey yr wythnos diwethaf.
Mae Ffion yn wreiddiol o Lanystumdwy ac ar ôl treulio blynyddoedd yn perfformio yn Llundain, mae hi bellach wedi ymgartrefu yng Nghaernarfon ac yn cyflwyno ar BBC Radio Cymru bob nos Wener a nos Sadwrn.
Beth ydi dy atgof cyntaf?
Weithiau mae'n anodd gwahaniaethu rhwng atgof a hen lunia'. Ond un atgof sy' gen i, a diolch i'r drefn bo' na'm llun, ydi yn y garafán yn Steddfod '95, wythnos cyn i mi gael fy mhen-blwydd yn bedair oed. Ar ôl bwyta bocs cyfan o Frosties efo Steff, oedd yn yr ysgol efo fi, mi wnes i ddeffro yn hwyrach ymlaen yn y noson, yn y garafán efo Mam a Dad a mrodyr Rhys a Tudur, a chwydu dros fy sleeping bag deinasors pinc. A dwi'n cofio bod wrth y tap, tu allan yn yr oerfel, efo Mam druan yn fy ngolchi fi a'r sleeping bag. Sori Mam.
Y noson orau i ti ei chael erioed?
Mwy na thebyg mai opening night Jesus Christ Superstar yn yr O2 Arena yn Llundain. Hwn oedd fy swydd gynta' i allan o'r coleg drama ac i berfformio o flaen 20,000 o bobl, mi oedd o'n brofiad 'na'i drysori am weddill fy mywyd.
Noson agoriadol Jesus Christ Superstar
Disgrifia dy hun mewn tri gair.
Hwyliog, cadarnhaol a brwdfrydig.
Pa ddigwyddiad yn dy fywyd sy' o hyd yn gwneud i ti wenu neu chwerthin pan ti'n meddwl nôl?
Mwy na thebyg Steddfod Bala 2009. Steddfod pan o'n i'n yr ail flwyddyn yn chweched dosbarth, cyn symud i Lundain. Mi oedd 'na nosweithia' gwyllt a hwyliog iawn yn y Steddfod yna. Dyddia da!
Beth oedd y digwyddiad a gododd y mwya' o gywilydd arnat ti erioed?
Mi fydda' i'n un am gysgu ar ôl amball i ddrinc… ac ar ôl ryw ddiwrnod o ymarfer ar gyfer Sweeney Todd yn y West End mi aeth 'na griw ohonom allan. A chal dipyn i yfad. Mi nes i rannu tacsi efo hogyn oedd yn y sioe efo fi oedd digwydd bod yn byw rownd gongl i mi yn Peckham. Mi o'n i'n cysgu'n braf yng nghefn y tacsi, ac ar ôl ei ollwng adra, roedd yn amser i mi roi fy nghod post i mewn…
Mi nes i ddeffro tu allan i dŷ yr oeddwn yn byw ynddo tra'n y coleg, yng ngogledd Llundain, ac heb fyw yno ers pum mlynedd. Felly tra yn hanner cysgu a wedi meddwi, mi oeddwn i wedi rhoi y cod post anghywir i'r dreifar. Ma' Llundain yn le mawr, a'r noson yna mi es i o Shoreditch (dwyrain Llundain) i Peckham (de Llundain), i Alexandra Palace (gogledd Llundain) a'n ôl i Peckham adra. Ma' gen i dal ormod o gywilydd i rannu cost y trip…
Pryd oedd y tro diwethaf i ti grïo?
Ar hen do fy ffrind gorau Lois ddechrau Gorffennaf. Mi oedd 'na lot o grïo-chwerthin a lot o grïo o hapusrwydd y penwythnos yna.
O archif Ateb y Galw:
Pa lun sy'n bwysig i ti a pham?
Llun ohona i a Taid dre ar ben cowntar siop Tots to Teens yn Pwllheli. Mi dreuliais i gymaint o 'mhlentyndod i yn y siop efo Taid a Nain a Mam, a mi o'dd Taid mor gefnogol ohona fi bob tro. Babi Taid dre go iawn!
'Fi a Taid'
Oes gen ti unrhyw arferion drwg?
Pigo a crafu sbots. Dwi'n gwybod mod i ddim i fod i 'neud ond alla' i'm peidio os oes 'na un yn codi. A fel rywun sydd wedi cael acne drwg, mi oedd hi'n arfer bod yn arferiad drwg IAWN.
Beth yw dy hoff lyfr, ffilm neu bodlediad a pham?
Y ffilm Notting Hill. Mi oedd genna ni'r tâp adra, a dwn i'm faint o weithia dwi wedi'i gweld hi. Caru Julia Roberts, y stori, y gerddoriaeth - ma' bob dim am y ffilm yn spot on.
Dy hoff le yng Nghymru a pham?
Wedi fy magu yn Llanystumdwy, mae'n rhaid i mi ddeud bod 'na nunlla yn debyg i adra! Ond mae 'na un olygfa arbennig ar dro dwi wedi ei gwneud filoedd o weithia ar lôn top o Lanystumdwy i Gricieth ar Lôn Fêl, lle da chi'n sbïo lawr ar Gricieth ac ar hyd yr arfordir. Mi fyddai'n stopio yna am sbelan bob tro.
Yr olygfa o'r lôn top o Lanystumdwy i Gricieth ar lôn Fêl
Byw neu farw, gyda phwy fyddet ti'n cael diod?
Mae'n rhaid i mi ddewis fy arwres Aretha Franklin.
Ar dy ddiwrnod olaf ar y blaned, beth fyddet ti'n ei wneud?
Cal homar o barti efo pawb dwi'n 'nabod, gwario pob ceiniog sy' gen i ar fandiau byd enwog fatha Chic, JLO a Beyoncé i ddod yna, tra'n yfad Aperol Spritz ac Espresso Martinis drw' nos.
Beth ti'n edrych mlaen at wneud mwya' unwaith fydd pandemig Covid wedi dod i ben?
Dwi'n berson hygs mawr, felly cofleidio PAWB!
Dyweda rywbeth amdanat ti dy hun nad oes yna lawer o bobl yn ei wybod.
Bod ngwallt i wedi bod yn gwynu/britho ers yn 14 oed.
Petaset ti'n gallu bod yn rhywun arall am ddiwrnod, pwy fyddai ef/hi?
Mwy na thebyg Beyoncé, a mi fyswn i'n canu a downsio drw' dydd a methu stopio sbïo arna' fi'n hun yn y drych.
Pwy sydd yn Ateb y Galw wythnos nesaf?
Elan Rhys.
