Llafur Cymru'n canslo cynhadledd yn sgil pryder Covid

Mae Llafur Cymru wedi canslo ei chynhadledd ar gyfer 2021 wrth i'r blaid ragweld y bydd achosion Covid a phwysau ar y GIG yn cynyddu dros yr hydref.

Roedd y gynhadledd wedi cael ei symud o fis Chwefror eleni i rhwng 5 a 7 Tachwedd.

Dyw'r blaid heb gynnal cynhadledd ers 2019 oherwydd y pandemig, ac roedd disgwyl i tua 1,000 o bobl fynychu'r digwyddiad yn Llandudno ar ddechrau Tachwedd.

"Dydy'r feirws ddim wedi diflannu, ac yr awgrym yw y dylen ni ddisgwyl cyrraedd brig o ran achosion a phwysau ar systemau iechyd a gofal yn yr hydref," meddai llefarydd ar ran y blaid.

"Dyw hi ddim wedi bod yn benderfyniad hawdd ond rydyn ni'n credu mai dyma'r un cywir."

Daw'r penderfyniad ddiwrnod yn unig wedi i arweinydd y blaid, y Prif Weinidog Mark Drakeford ddweud fod bywydau pobl Cymru "bron yn ôl" i sut oedd pethau cyn y pandemig.

Ar hyn o bryd mae disgwyl i gynhadledd wanwyn y blaid gael ei gynnal rhwng 11 a 13 Mawrth 2022.