Cwmni yn prynu safle hen bafiliwn pier Llandudno

Dyma'r cynlluniau gafodd eu cyflwyno yn 2016 i ddatblygu'r tir wrth y pier a'r Grand Hotel

Mae safle pafiliwn pier Llandudno, sy'n segur ers dros chwarter canrif, wedi cael ei werthu.

Cyhoeddodd y cwmni sy'n berchen ar y pier ei hun, Tir Prince Leisure Group, eu bod wedi prynu'r pafiliwn Fictoraidd a gafodd ei ddinistrio gan dân yn 1994.

Cafodd cynlluniau eu cyflwyno a'u cymeradwyo gan Gyngor Conwy yn 2016 i ddatblygu fflatiau a bwyty ar y safle.

Ond fe gafodd y cais ei alw i mewn gan Lywodraeth Cymru yn 2018 am ragor o graffu.

Cyhoeddodd perchnogion y pafiliwn yn ddiweddar fwriad i geisio ei werthu mewn ocsiwn.

O ganlyniad i benderfyniad cwmni Tir Prince Leisure Group, bydd y pier a'r pafiliwn yn dod o dan yr un berchnogaeth am y tro cyntaf mewn dros 40 o flynyddoedd.

Cafodd yr hen bafiliwn ei ddifrodi gan dân yn 1994

Gan fod y Ceidwadwyr wedi cynnal sawl cynhadledd yn y pafiliwn, mae ymwelwyr â'r safle dros y blynyddoedd yn cynnwys Winston Churchill a Margaret Thatcher.

Mae yna gred taw yn ystod digwyddiad yn yr hen bafiliwn yn 1948 y penderfynodd hithau fentro i'r byd gwleidyddol.

Dywed y cwmni mewn datganiad eu bod "yn falch o gyhoeddi eu bod wedi sicrhau pryniant tir Pafiliwn Pier Llandudno" yn dilyn trafodaethau a "sawl cyfarfod gwerth chweil" yn y misoedd diwethaf gyda'r perchnogion presennol.

"O ystyried pa mor agos yw i'r pier a'r ffaith eu bod, tan 1980, dan yr un berchnogaeth ac yn rhan o'r un darn o dir, roedd ei brynu yn benderfyniad hawdd," ychwanega'r datganiad.

Hen bileri haearn oedd yn rhan o'r pafiliwn gwreiddiol

'Y gwaith caled yn dechrau rŵan'

Mae'r cwmni'n gobeithio y bydd prynu'r safle'n "helpu sicrhau dyfodol hirdymor Pier Llandudno a safle Llandudno fel gem yng nghoron sector twristiaeth gogledd Cymru trwy wella ar yr hyn sydd ar gynnig a sicrhau bod sawl cenhedlaeth yn gallu parhau i'w fwynhau yn y dyfodol".

Ychwanegodd y cwmni: "Mewn sawl ffordd, mae'r gwaith caled yn dechrau rŵan ond rydym yn hyderus y gallwn ni wneud rhywbeth gwirioneddol gwerth chweil gyda'r safle yma a bydd rhagor o gyhoeddiadau maes o law."

Adam Williams yw perchennog Tir Prince Leisure Group, sydd hefyd yn rhedeg trac rasio ceffylau Tir Prince a sawl arcêd yn Nhowyn, ger Y Rhyl.