Penodi Archddiacon Wrecsam yn Esgob Abertawe ac Aberhonddu

John Lomas fydd degfed Esgob Abertawe ac Aberhonddu

Mae'r Eglwys yng Nghymru wedi cyhoeddi mai Archddiacon Wrecsam, John Lomas, fydd Esgob newydd Abertawe ac Aberhonddu.

Mr Lomas fydd y degfed esgob wedi i'r cyn-esgob ac Archesgob Cymru, John Davies, ymddeol yn gynharach eleni.

Cafodd y penodiad ei wneud gan Fainc yr Esgobion wedi i Goleg Etholiadol yr Eglwys yng Nghymru fethu â dod i benderfyniad ym mis Medi.

Arferai Mr Lomas fod yn beiriannydd awyrennau a bu'n gwasanaethu yn y Llynges Frenhinol yn ystod Rhyfel Ynysoedd y Falkland.

Fe fethodd y Coleg Etholiadol benodi esgob ym mis Medi eleni

Yn ei swydd yn Archddiacon Wrecsam roedd John Lomas yn rhan o'r tîm a arweiniodd at gais llwyddiannus yr esgobaeth am £1.9m ar gyfer prosiect efengylu mawr yng nghanol Wrecsam.

Bydd y penodiad yn cael ei gadarnhau ar 21 Tachwedd mewn cyfarfod o Synod Cysegredig Esgobion yr Eglwys yng Nghymru yn Eglwys San Silin, Wrecsam.

Yn ystod y misoedd nesaf mae disgwyl i'r Eglwys benodi Archesgob Cymru wedi ymddeoliad John Davies

Dywedodd yr Uwch Esgob, Andy John: "Bydd John yn ychwanegiad rhagorol at Fainc yr Esgobion ac rwy'n falch iawn ei fod wedi derbyn y swydd hon.

"Mae'n angerddol dros efengylu ac am gefnogi clerigwyr yn eu gweinidogaeth fugeiliol. Yn bennaf oll, mae'n canolbwyntio ar bobl - mae'n gwybod sut i fynd ochr yn ochr ag eraill a'u helpu.

"Rhoddodd ei brofiad yn y Llynges Frenhinol, yn benodol, werthfawrogiad iddo y gall bywyd fod yn anodd ac mae'n wynebu heriau gyda gobaith ac egni, yn ogystal â synnwyr digrifwch cynnil."

Yn ystod y misoedd nesaf mae disgwyl y bydd trefniadau yn cael eu gwneud ar gyfer ethol Archesgob Cymru.