Iawndal i glaf am lawdriniaeth ddiangen i dynnu colon

Mae Bwrdd Iechyd Prifysgol Caerdydd a'r Fro wedi derbyn canfyddiadau a chasgliadau adroddiad yr Ombwdsmon

Bydd claf sydd â Syndrom Asperger yn derbyn iawndal o £10,000 wedi i ombwdsmon ddod i gasgliad ei fod wedi cael llawdriniaeth ddiangen.

Lansiodd Ombwdsmon Gwasanaethau Cyhoeddus Cymru ymchwiliad ar ôl derbyn cwyn gan glaf a elwir yn Mr D am y gofal a'r driniaeth a gafodd yn Ysbyty Athrofaol Cymru, Caerdydd.

Yn ei adroddiad dywed yr Ombwdsmon, Nick Bennett, fod Mr D wedi cael diagnosis anghywir ac na ddylai fod wedi cael llawdriniaeth i dynnu rhan o ochr dde ei golon.

Mae Bwrdd Iechyd Caerdydd a'r Fro wedi derbyn casgliadau'r adroddiad.

Diffyg gwybodaeth glir

Roedd Mr D wedi cwyno nad oedd wedi cael diagnosis clir, a bod clinigwyr yn araf yn canfod iddo waedu ar ôl y llawdriniaeth - o ganlyniad bu'n rhaid iddo gael llawdriniaeth frys ychwanegol.

Dywedodd Mr D hefyd nad oedd gwybodaeth am ei driniaeth a'i ofal yn cael ei chyfleu'n glir iddo er gwaethaf y ffaith bod ganddo Syndrom Asperger.

Roedd hefyd yn anhapus am rai agweddau o'i ofal ar ôl iddo gael ei ryddhau o'r ysbyty.

Dywed Nick Bennett na ddylai'r claf fod wedi cael llawdriniaeth i dynnu rhan o ochr dde ei golon

Canfu'r Ombwdsmon fod Mr D wedi cael llawdriniaeth yn seiliedig ar y rhagdybiaeth bod ganddo Glefyd Crohn, ond fe wnaeth canfyddiadau llawfeddygol diweddarach awgrymu bod ganddo lid cronig a chymhleth ar y pendics.

Noda'r adroddiad na fyddai'r naill gyflwr neu'r llall yn golygu bod angen i Mr D gael y llawdriniaeth fawr a gafodd.

Daeth yr Ombwdsmon i'r casgliad hefyd nad oedd cofnod cyflawn o sut gafodd cyflwr Mr D ei fonitro wedi ei lawdriniaeth a dywed y gellid fod wedi canfod yn gynt ei fod yn gwaedu ar ôl hynny.

Roedd clinigwyr, medd yr adroddiad, yn ymwybodol bod gan Mr D Syndrom Asperger ond nid oeddent wedi llwyddo i gyfleu'n glir iddo y wybodaeth am ei ddiagnosis a'i driniaeth. Ni chafodd chwaith weld clinigydd iechyd meddwl er ei fod wedi gofyn am hynny.

Ond doedd yr Ombwdsmon ddim yn credu bod sail i gŵyn Mr D am y gofal a gafodd ar ôl ei ryddhau.

• Y flogiwr sy'n helpu pobl ag awtistiaeth

• Wynebu'r dyfodol gydag awtistiaeth

Trawma y gellid bod wedi'i osgoi

Wrth gyflwyno sylwadau ar yr adroddiad, dywedodd Mr Bennett: "Dylai'r meddygon a oedd yn gyfrifol am ofal Mr D fod wedi mabwysiadu dull o 'gadw golwg a phwyllo' oherwydd mae'n debyg y byddai ei gyflwr wedi setlo heb driniaeth lawfeddygol.

"Yn hytrach, roedd Mr D, a oedd yn unigolyn bregus, wedi wynebu trawma y gellid bod wedi'i osgoi yn sgil llawdriniaeth ddiangen a chymhlethdodau ar ôl y driniaeth - trawma a arweiniodd at orfod ceisio cymorth iechyd meddwl."

Fe wnaeth yr Ombwdsmon argymell:

• Bod Bwrdd Iechyd Caerdydd a'r Fro yn cynnig ymddiheuriad manwl a thaliad iawndal o £10,000 i Mr D;

• Bod y meddygon a'r nyrsys a gyfrannodd at ofal Mr D yn cael hyfforddiant perthnasol ar reoli Clefyd Crohn a llid cronig y pendics yn ogystal â darparu a rheoli gofal i gleifion gyda Syndrom Asperger;

• Dylai'r tîm nyrsio ystyried pwysigrwydd cynnal a chofnodi arsylwadau ar ôl y llawdriniaeth a pharatoi cynlluniau gofal cywir a pherthnasol.

Mae Bwrdd Iechyd Caerdydd a'r Fro wedi derbyn canfyddiadau a chasgliadau adroddiad yr Ombwdsmon ac wedi cytuno i weithredu ei argymhellion.