Ateb y Galw: Heulwen Beasley Park
- Cyhoeddwyd
Yr arbenigwr dysgu Heluwen Beasley Parks sy'n Ateb y Galw yr wythnos yma ar ôl iddi gael ei henwebu gan Meggan Lloyd Prys yr wythnos ddiwethaf.
Cafodd Heulwen ei geni a'i magu yn Sir Gaerfyrddin, a mae hi bellach yn byw yng Nghaerdydd.
Mae'n arbenigwr dysgu a datblygu sy'n gweithio i Senedd Cymru.
Beth ydi dy atgof cyntaf?
Edrych ar y sêr o fy 'stafell wely yn aros i weld sled Siôn Corn yn hedfan trwy'r awyr. Bues i'n aros yno drwy'r nos!
Y noson orau i ti ei chael erioed?
Bues i a fy ngŵr yn teithio o amgylch Seland Newydd a mi wnaethom ni ffeindio lle ar bwys traeth i barcio'r camperfan am y noswaith.
Aethon ni am dro ar hyd yr arfordir a sgwrsio gyda physgotwyr lleol Māori. Dwi'n cofio edrych mas ar y môr o wely'r camperfan yn yfed gwin coch a bwyta cracyrs a chaws a meddwl bod bywyd yn berffaith yn yr eiliad honno. Roedd yn hollol hudolus.
Ro'n ni hefyd newydd ddyweddïo cwpl o ddyddiau ynghynt a'n teimlo ar dop y byd!
Disgrifia dy hun mewn tri gair.
Sensitif, optimistaidd, ystyriol.
Dy hoff le yng Nghymru a pham?
Dyffryn Tywi. Lle hardd a mae pobl Sir Gâr mor dwym a hamddenol.
Dwi wrth fy modd yn mynd nôl i'r Gorllewin i alw gyda teulu a ffrindiau. Does dim brys o gwbl a dwi'n teimlo'n heddychlon iawn yno.
Dyffryn Tywi
Pa ddigwyddiad yn dy fywyd sy' o hyd yn 'neud i ti wenu neu chwerthin pan ti'n meddwl nôl?
Gwylio arth yn pysgota tra'n bwyta bwyd tu fas i Vancouver. Roedd yr arth yn caru byw! Roedd fel bod mewn ffilm Disney!
Beth oedd y digwyddiad a gododd y mwya' o gywilydd arnat ti erioed?
Dysgwyr yn dod i fy nesg ar ôl anghofio'n llwyr fod gen i sesiwn hyfforddiant i'w ddarparu. Dyw heb ddigwydd eto ers 'ny. Ro'n i'n hollol mortified.
Pryd oedd y tro diwethaf i ti grïo?
Dwi'n llefen yn aml. Dwi'n caru pobl a'n empathig iawn. Os mae rhywun wedi ypsetio, dwi'n cael fy effeithio a'n teimlo pob dim.
O archif Ateb y Galw:
Oes gen ti unrhyw arferion drwg?
Gor-feddwl ac imposter syndrome. Dwi'n dysgu yn ara' deg bod ddim angen cario pwysau'r byd ar fy 'sgwyddau.
Beth yw dy hoff lyfr, ffilm neu bodlediad a pham?
Llyfrau Harry Potter - mae rhywbeth mor nostalgic amdanynt. Podlediadau Dewr, Gwrachod Cymru a Colli'r plot hefyd yn wych!
Byw neu farw, gyda phwy fyddet ti'n cael diod?
Mam-gu. Dwi'n gweld ei heisiau hi gymaint. A'i storis. Roedd hi hefyd yn ffan mawr o rannu potel o win coch, yn union fel fi.
Dyweda rywbeth amdanat ti dy hun nad oes yna lawer o bobl yn ei wybod.
Dwi'n berson mewnblyg. Er mod i'n hoff iawn o bobl, dwi angen gorwedd lawr mewn stafell dywyll ar ôl treulio lot o amser yng nghwmni pobl.
Ar dy ddiwrnod olaf ar y blaned, beth fyddet ti'n ei wneud?
Dawnsio, yfed gwin coch a rhoi cwtsh i bawb ar draeth yng Ngorllewin Cymru. A gwylio'r machlud haul.
Pa lun sy'n bwysig i ti a pham?
Y diwrnod gwnes i briodi fy ffrind gorau!
Diwrnod priodas Heulwen
Petaset ti'n gallu bod yn rhywun arall am ddiwrnod, pwy fyddai ef/hi?
Prif Weinidog Cymru - jest am un diwrnod.
Pwy sydd yn Ateb y Galw wythnos nesaf?
Huw Clarke
