Pobl yn cael eu hachub mewn cwch yn Llandinam

Yr A470 yn Llandinam wedi i'r Afon Hafren orlifo

Bu'n rhaid i bobl adael eu cartrefi ac fe gafodd saith o bobl yn Llandinam eu hachub gan gwch wedi i Afon Hafren orlifo yn ystod Storm Franklin, medd cynghorydd.

Dywedodd Karl Lewis fod un person wedi cael ei gludo i'r ysbyty er mwyn bod yn ofalus.

Mae nifer o rybuddion gwynt a llifogydd mewn grym wrth i Gymru wynebu tywydd garw ddydd Sul a ddydd Llun.

Fe wnaeth Storm Franklin daro Cymru ychydig ddiwrnodau ar ôl difrod Storm Eunice.

Roedd miloedd o gartrefi heb drydan dros y penwythnos yn sgil gwyntoedd o 92mya, a nos Sul roedd 800 yn parhau heb drydan.

Yn ôl Mr Lewis, llifodd dwr i bedwar o dai yn Llandinam wedi i law trwm achosi i'r afon orlifo am tua 16:00 ddydd Sul.

• Miloedd dal heb drydan wedi difrod Storm Eunice

• Storm Eunice: Miloedd heb bŵer a gwyntoedd 90mya

Dywedodd Mr Lewis y bobl a gafodd eu hachub yn "oedrannus a bregus".

"Mae lefelau'r afon yn gostwng nawr, ond nid oes modd croesi'r A470 o hyd."

Dywed Cyfoeth Naturiol Cymru bod dros 20 o rybuddion llifogydd mewn grym a bod y nifer yn debygol o godi, ac fe wnaeth yr Afon Hafren a'r Afon Efyrnwy gofnodi eu lefelau uchaf erioed ym Mhowys.

Llwybr gerdded yn y Drenewydd, Powys, wedi ei orchuddio'n llwyr gan ddŵr

Mae rhybudd melyn ar gyfer gwynt hefyd mewn grym tan 13:00 ddydd Llun.

Brynhawn Sul roedd gwasanaeth Rhybuddion Teithio Sir Gâr yn hysbysu bod y ffordd rhwng Saron a Henllan ar gau wedi i goeden gwympo a nodwyd hefyd bod coeden wedi cau'r ffordd yr A4066 ger Pentywyn.

Roedd yna neges bellach gan Heddlu Dyfed-Powys bod yr A470 rhwng Rhaeadr a Llangurig ar gau a ffordd yr A458 rhwng Llanfair Caereinion a Chyfronnydd oherwydd llifogydd.

Fe ddisgrifiodd Sara Gibson amodau gyrru anodd ar yr A458 ym Mhowys wrth i'r afon godi.

Dywedodd y cynghorydd Myfanwy Alexander o Gyngor Sir Powys nos Sul ei bod hi'n annog pobl i beidio â gyrru, a'i bod hi erioed wedi gweld y fath lifogydd yn Nyffryn Banw, sydd rhwng Llanerfyl a Llanfair Caereinion.

Roedd hi'n tybio y byddai'r holl ffyrdd mewn i Feifod ynghau yn fuan, gan ychwanegu ei bod wedi clywed adroddiadau o dai dan ddŵr.

Ychwanegodd llefarydd ar gyfer Cyfoeth Naturiol Cymru y gellid disgwyl llifogydd o gwmpas rhannau helaeth o arfordir Cymru ac y gallai nifer o afonydd eraill orlifo - yn eu plith yr Afon Dyfrdwy yn Wrecsam a'r Afon Wysg yng Nghasnewydd a Sir Fynwy.

Yr afon yn Llanidloes brynhawn Sul

Disgwyl gwyntoedd o hyd at 70mya

Fe ddaeth rhybudd melyn ar gyfer gwynt i rym am hanner dydd yng Nghymru.

Mae'r rhybudd tywydd diweddaraf yn para tan 13:00 ddydd Llun gyda'r Swyddfa Dywydd yn rhybuddio y gellid disgwyl gwyntoedd o hyd at 70mya.

Rhybuddir y gall y tywydd effeithio ar rai ffyrdd a rheilffyrdd gan amharu ar gynlluniau teithio.

Ewyn y tonnau yn Aberystwyth fore Sul

Mae Trafnidiaeth Cymru wedi newid eu hamserlenni yn sgil y tywydd a dywedodd llefarydd y bydd y newidiadau hynny yn parhau yn sgil y difrod a achoswyd gan Storm Eunice.

Mae'r rhybuddion tywydd diweddaraf ar wefan y Swyddfa Dywydd, rhybuddion llifogydd ar wefan Cyfoeth Naturiol Cymru, a'r holl fanylion i deithwyr ar safleoedd Trafnidiaeth Cymru a Thraffig Cymru.

Mae nifer o ffyrdd yn parhau ar gau o ganlyniad i gwymp coed, rhannau o adeiladau a cheblau trydan wedi Storm Eunice - yn eu plith ffordd Goetre Fach yng Nghilâ, Abertawe wedi i deils gael eu chwythu o do capel.

Yr Afon Wysg yn Aberhonddu ddydd Sul

Mae Pont Hafren yr M48 yn Sir Fynwy ar gau ddydd Sul ac mae Pont Britannia yn y Gogledd ar gau i gerbydau uchel.

Yng Nghaerdydd fe wnaeth coeden gwympo ar ben tŷ ar Heol y Gadeirlan ger canol y ddinas.

Dywedodd Yoko Hargreaves, 23, sydd yn byw mewn fflat gafodd ei daro gan y goeden: "Roedden ni wedi bod yn edrych mas trwy'r ffenest yn rheolaidd oherwydd difrifoldeb y tywydd.

Mae coeden wedi cwympo mewn i dŷ ger canol Caerdydd

"Yr eiliad nesaf, fe welon ni goeden enfawr yn cwympo mewn i'r adeilad. 'Naeth e ddigwydd mewn llai na 30 eiliad."

Nid oedd unrhyw niwed difrifol i unrhyw beth yn y fflat, meddai, ond roedd difrod i adeilad eu cymdogion.

"Mae ffens ein cymdogion wedi cael ei blygu yn hanner gan rym y goeden, gyda nifer o'u ffenestri wedi eu torri.

"Dw i'n credu y gwnaethon ni gymryd fod y storm ar ei waethaf ddydd Gwener, felly roedd hi'n annisgwyl iawn i gael coeden yn cwympo ar yr adeilad heddiw. Roedden ni'n cadw meddwl am gymaint yn waeth y gallai hi wedi bod petai rhywun wedi bod o dan y goeden."

Mae Christchurch Road yng Nghasnewydd ynghau wedi i goeden ddisgyn