'Nath o ddim croesi fy meddwl fod rhywbeth mor fawr o'i le'
- Cyhoeddwyd
Mae Nicky John yn wyneb adnabyddus ar y teledu ers blynyddoedd, yn gyflwynydd ar y rhaglen bêl-droed boblogaidd Sgorio ar S4C. Ond yn ddiweddar mae Nicky a'i gŵr, Gwion, wedi bod drwy gyfnod anodd ar ôl i'w merch Emi gael diagnosis o gancr Wilms ac yn derbyn gofal arbenigol.
Yma mae Nicky'n rhannu'r hanes o sut wnaeth ei merch blwydd oed gael diagnosis o gancr, a sut mae'r teulu'n ymdrin â'r sefyllfa.
Mae'n un o'r sefyllfaoedd 'na sy'n siŵr o fod ymhlith rhestr hunllefau unrhyw riant. Yn fy achos i, un o'r pethau sydd wedi chwarae ar fy meddwl fwyaf yn ystod y mis diwethaf yw 'sut na sylwais i fod rhywbeth o'i le ar fy mhlentyn?' Ond wir i chi, doedd gen i ddim syniad.
Wythnos cyn y Nadolig bu'n rhaid inni dreulio ychydig ddyddiau yn Ysbyty Gwynedd gydag Emi, sydd ychydig dros flwydd oed bellach, gan roedd ganddi infection dŵr.
Yn dilyn hynny, gan ei bod hi mor ifanc ar y pryd, trefnwyd sgan iddi yng nghanol mis Mawrth eleni - does bosib bod y meddygon yn amau bod unrhywbeth o'i le ar y pryd gan fod 3 mis wedi mynd heibio rhwng y naill beth â'r llall.
Gwion, gŵr Nicky a tad Emi
Cychwynnodd diwrnod y sgan ei hun fel unrhyw ddiwrnod arall, ac yn aml iawn dw i'n ffeindio'n hun yn meddwl yn ôl am hynny a pha mor ddi-glem oeddwn i, heb syniad yn y byd o'r hyn oedd o'n blaenau. Sgwrsio efo'r ddwy oedd yn gwneud y sgan am wreiddiau enw Emi Elea (doeddan nhw heb glywed enw fel ei un hi o'r blaen!) a phoeni am gyrraedd y car heb wlychu ar y ffordd allan gan fod hi'n tresio bwrw glaw… doeddwn i ddim eisiau iddi dal annwyd!
O fewn awr neu ddwy o adael yr ysbyty, cefais alwad gan ein GP i ddweud bod angen inni fynd yn ôl yn syth i ward Dewi. Roeddwn i wedi mynd ag Emi i Pili Palas i chwarae ac am ginio yn lle mynd yn syth adre, ac roedd o'n job clywed y doctor yn iawn, ond am fod Emi i'w gweld mor hapus ynddi'i hun nath o ddim croesi fy meddwl am eiliad fod rhywbeth mor fawr o'i le.
Aeth Emi Elea i'r ysbyty gyda haint dŵr cyn Nadolig y llynedd
Diolch i'r nefoedd fe ddaeth Gwion, fy ngŵr, i gyfarfod ni yno, ac o fewn dim roedd y doctor wedi dod i'n gweld ni. Gofynnodd inni eistedd. Dw i ddim yn cofio llawer o'r hyn ddigwyddodd nesaf, ond dw i yn cofio nad oedd hi'n gallu edrych arnai wrth roi'r newyddion. Roeddwn i'n teimlo drosti'n ofnadwy. Am uffarn o job, i orfod rhoi ffasiwn newyddion i rieni plentyn!
Teithio i Ysbyty Alder Hey
Y noson honno cawsom ein hanfon yn syth i Alder Hey, gyda chant a mil o gwestiynau yn nofio o gwmpas ein pennau ar hyd y siwrne.
Bu cyfres o sganiau dros y dyddiau nesaf, ond pnawn dydd Gwener cawsom fynd yn ôl adref i ddisgwyl tan dydd Llun am y canlyniadau; at ein mab Sam Elwyn sy'n chwe blwydd oed. Roedd hynny'n gymaint o fendith.
Mae gan fechgyn bach chwech oed ffordd arbennig iawn o gadw eich meddwl chi'n brysur, a thrwy'r broses yma i gyd dwi mor ddiolchgar iddo a falch ohono am y ffordd mae o 'di delio efo bob dim. Mae gan Sam feddwl y byd o'i chwaer fach, ac i Emi, Sam ydi ei ffrind gorau yn y byd.
Ffrindiau gorau; Sam ac Emi
Felly, daeth dydd Llun y canlyniadau. Diwrnod hir, di-ddiwedd o aros am yr alwad ffôn gan Alder Hey. Er mai fy rhif ffôn i oedd ganddynt, doeddwn i ddim yn gallu wynebu cymryd yr alwad fy hun, felly nes i ofyn i Gwion gymryd fy ffôn, ac fe aeth y diwrnod heibio mewn blur o ddagrau, gwylio'r cloc, stumog yn troi, taflu fyny, methu aros yn llonydd.
Diagnosis Cancr Wilms
O'r diwedd fe ganodd y ffôn ac fe cawsom gadarnhad o gyflwr Emi fach. Mae ganddi math o gancr o'r enw Wilms, yn y naill aren a'r llall.
Roedd clywed y cadarnhad yna gan Gwion yn haws i glywed na gan rywun dieithr rywsut. Drwy'r cyfan, mae o wedi bod mor gryf yn delio efo'r ochr yna o bob dim, ei ben yn ymarferol ac yn meddwl am y broses sydd o'n blaenau; lle i mi, mae 'na dal elfennau dw i'n stryglo i brosesu, i glywed, ac i ddweud allan yn uchel.
Emi a Nicky
Mae Emi bellach hanner ffordd drwy ei chwe wythnos cyntaf o chemotherapy, ac mae'r daith wythnosol i Alder Hey wedi dod yn rhan o'n rwtîn newydd ni erbyn hyn.
Y bwriad ydi rhoi llawdriniaeth ar ôl y bloc cyntaf o chemo, ond 'dan ni'n gwybod hefyd bod 'na bosibilrwydd o addasu'r amserlen i roi rhagor o chemo o flaen llaw os ydi'r doctoriaid yn teimlo y bydd hynny'n fuddiol, ac yn sicr y bydd rhagor o driniaeth i ddilyn wedi'r op.
Emi yn ysbrydoliaeth
Trwy hyn i gyd, mae Emi ei hun wedi bod yn ysbrydoliaeth llwyr. Ar hyn o bryd, mae hi'n fabi bach hapus a digon bodlon ei byd ar y cyfan, a dw i'n ceisio atgoffa fy hun yn ddyddiol mai dyma'r peth pwysig imi ganolbwyntio arno. Edrych arni hi, a chymryd fy ysbrydoliaeth o fanno. Ceisio osgoi meddwl rhy bell o flaen llaw.
Wrth gwrs, mae 'na gyfnodau lle mae hynny'n anodd, ond buan iawn da chi'n ffeindio'ch hun mewn lle eitha' tywyll os 'dach i'n gadael i'r meddwl grwydro'n ormodol. Y cwestiynau a'r holl edrych am atebion. Sut ddigwyddodd hyn? Oes 'na rhywbeth ddylwn i fod wedi gwneud yn wahanol fysa wedi osgoi'r sefyllfa yma?
Emi, Gwion a Sam
Mae 'na gapel bach yn Alder Hey, a dyna lle fyddai'n ffeindio'n hun am gyfnod bach bob wythnos. Weithiau ar ben fy hun, weithiau gydag eraill, o wahanol gefndir a chrefydd ond pob un ohonom yn gofyn wrth Duw am yr un peth. I wella'n plant.
'Cefnogaeth anhygoel'
Dwi ddim yn siŵr os fyswn i wedi dod drwy'r mis diwethaf heb y gefnogaeth hollol anhygoel rydan ni wedi ei dderbyn - mae'r caredigrwydd sydd wedi cael ei ddangos tuag atom wirioneddol yn golygu gymaint.
Does 'na 'run diwrnod wedi mynd heibio lle dw i heb ddeffro i neges ar fy ffôn gan rywun, yn checkio fewn, yn cynnig helpu, yn barod i fod yn glust i wrando.
Drwy'r cyfan mae Nicky a Gwion yn parhau i fod yn bositif
Mae 'na dîm anhygoel o bobl o'n cwmpas ni, o'r nyrsys a'r doctoriaid, i weithwyr cefnogol o'r elusen CLIC Sargent/Young Lives vs Cancer, ac yna, ein teulu a ffrindiau arbennig.
Rhaid imi ddweud hefyd bod fy nghyflogwyr, Rondo a chriw Sgorio, a theulu pêl-droed Cymru yn gyffredinol wedi bod yn gefn anhygoel imi, a wna i fyth anghofio hynny.
Oes, mae ganddon ni ddipyn o siwrne o'n blaenau eto. Ma'n reid rollercoster does 'na neb eisiau bod yn rhan ohono, ond dyma lle ydan ni.
Yr unig beth sy'n saff ydi, drwyddo i gyd, os fedra i ddangos canran o'r dewrder mae'r hogan fach 'ma wedi dangos i ni dros yr wythnosau diwethaf, mi fydda i wedi gwneud yn ok hefyd.
Hefyd o ddiddordeb: