Clymblaid i barhau i reoli Cyngor Ynys Môn

Bydd Llinos Medi yn parhau i arwain Cyngor Môn wedi pum mlynedd wrth y llyw

Bydd clymblaid yn parhau i reoli Cyngor Môn er i Blaid Cymru sicrhau digon o gynghorwyr i weinyddu ar ben ei hun.

Yn yr etholiadau diweddar enillodd y blaid 21 o'r 35 sedd, gan sicrhau mwyafrif o gynghorwyr y sir.

Ond yn ystod cyfarfod ddydd Mawrth daeth cadarnhad bydd grŵp o gynghorwyr annibynnol yn parhau i fod â seddi ar y Pwyllgor Gwaith, fel rhan o glymblaid.

O ganlyniad bydd pedwar aelod y Grŵp Annibynnol, o dan arweinyddiaeth Ieuan Williams, yn ymuno â 21 Plaid Cymru.

Mae hyn yn gadael tri aelod Llafur, un Democrat Rhyddfrydol ac aelodau annibynnol eraill yn y gwrthbleidiau.

'Môn wedi adfer ei enw da'

Yn dilyn ei hail-ethol fel arweinydd, gyda'r Cynghorydd Carwyn Jones i fod yn ddirprwy iddi, dywedodd y Cynghorydd Llinos Medi bod y cyngor wedi "cymryd camau pwysig" yn ystod ei phum mlynedd wrth y llyw.

Bydd grŵp o gynghorwyr annibynnol, o dan arweinyddiaeth y Cynghorydd Ieuan Williams, yn parhau yn rhan o'r glymblaid sy'n gweinyddu'r cyngor ers 2017

Dywedodd bod taclo'r argyfwng tai ymysg ei blaenoriaethau ac ychwanegodd: "Erbyn hyn mae Ynys Môn wedi adfer ei enw da ymysg y teulu llywodraeth leol yng Nghymru; gyda Llywodraeth Cymru a Swyddfa Archwilio Cymru yn cydnabod y cynnydd sylweddol a wnaed o ran llywodraethiant ac mewn meysydd gwasanaeth allweddol.

"Fel bob amser mae croeso i aelodau'r wrthblaid herio'n polisïau ond mae'n rhaid i ni barhau i gynnal y perthnasau gwaith cadarnhaol a chynhyrchiol a sefydlwyd rhwng yr holl aelodau etholedig a byddaf yn gwneud fy ngorau i sicrhau bod hynny'n digwydd."